Uwari umukandida mu matora ya Perezida wa Uganda, Dr Kizza Besigye, yatsinze urubanza yaregagamo ikigo cya leta cy’itangazamakuru, Uganda Broadcasting Corporation (UBC), kwanga gutambutsa amatangazo amwamamaza mu 2011.
Inteko y’iburanisha yari iyobowe n’umucamanza Margaret Ogulion kuri uyu wa Mbere yategetse ko Dr Besigye ahabwa miliyoni 80 z’ama-shilling ya Uganda nyuma yo gusanga Besigye yarishyuye UBC miliyoni 21 z’ma-shilling ngo ihitishe amatangazo amwamamaza, ariko ntiyabikora.
Besigye yasabaga UBC gusubizwa miliyoni 21 ze yatanze hiyongereyeho impozamarira, ariko akomeza kubabazwa n’uko urubanza rwatinze, ku kirego yatanze mu 2011 urubanza rugacibwa mu 2018.
Besigye kandi yasabaga urukiko gutegeka UBC guhagarika kuvangura abantu bagendewe ku ruhande rwa politiki baherereyemo, cyane ko ubwo yiyamamazaga yari ahatanye na Perezida Yoweri Museveni batavuga rumwe.
Nk’uko bigaragara mu kirego yatanze kuri UBC n’uwari umuyobozi wayo, Edward Musinguzi, Besigye yishyuye miliyoni 21 z’ama-shilling ya Uganda ngo batambutse ubutumwa bwe burenga 200 mu kwiyamamaza, ariko nta na bumwe bwatambutse.
