Uhuru Kenyatta azarahira ku wa 28 uku kwezi

Urukiko rw’Ikirenga rutesheje agaciro ibirego bibiri by’abashakaga ko amatora aherutse gusubirwamo muri Kenya ku wa 26 Ukwakira yongera agasubirwamo ubwa gatatu kuko ataciye mu muco.

Perezida Uhuru Kenyatta na Visi Perezida we William Ruto bivuze ko bazarahira kongera kuyobora iki gihugu ku wa kabiri w’icyumweru gitaha.

Hari hashize iminsi abantu bategereje icyo urukiko ruzatangaza niba Kenyatta azarahirira kungera kuyobora Kenya mu y’indi manda cyangwa niba amatora azongera gusubirwamo.

Amatora muri Kenya amaze iminsi yaratumye imitwe ya benshi yarashyushye cyane cyane hagati y’abashyigikiye Uhuru Kenyatta na Raila Odinga utavugwa rimwe na we. Ibi byatumye igihugu kirangwamo imyigaragambyo yanagiye ihitana bamwe.

Railda Odinga wo mu Ishyaka ritavuga rumwe na Kenyatta (NASA), yatanze ikirego kijyanye n’uburyo amatora yabaye ku wa 8 Kanama yaranzwe no kwiba ku ruhande rwa Kenyatta hakoreshejwe ikoranabuhanga maze Urukiko narwo rwemeza ko atabaye mu muco maze rutegeka ko asubirwamo.

Ibi byaje gutuma amatora asubirwamo ku wa 26 Ukwakira ariko Odinga yanga kongera kwiyamamaza aho yavugaga ko nta cyemeza ko amatora azaba mu muco maze Kenyatta ayatsinda ku majwi 98%.

Bamwe mu banyamuryango bari ku ruhande rwa Raila Odinga batanze ibirego mu rukiko rw’Ikirenga bavuga ko amatora yasubiwemo atabaye mu muco ko yaranzwe n’uburiganya.

Urukiko rw’Ikirenga rwa Kenya rwasuzumye ibyo birego maze mukanya uyu munsi rwemeza ko nta shingiro bifite  ko Kenyatta byemejwe ko yatsinze amatora.