Umukinnyi Bukuru Christopher yirukanywe mu mwiherero w’ikipe ya APR FC azira imyitwarire mibi.

Mu gitondo cyo kuri iki cyumweru tariki 16 Gicurasi 2021 nibwo ubuyobozi bw’ikipe ya APR FC bwafashe umwanzuro wo kwirukana mu mwiherero uwari umukinnyi wayo Bukuru Christopher kubera imyitwarire mibi.

Nkuko iyi kipe yabitangaje ibinyujije ku rubuga rwayo rwa internet rwa www.aprfc.rw yatangaje ko uyu mukinnyi wo hagati mu kibuga yirukanywe mu mwiherero w’ikipe y’Ingabo kubera imyitwarire mibi yagiye imuranga.

Uyu mukinnyi kandi ngo akaba yaragiye agirwa inama kenshi ariko agakomeza kugorwa no kwikosora, aha rero akaba ariho ubuyobozi bwa APR FC bwahisemo ku mwirukana mu mwiherero kugira ngo ajye kwitekerezaho.

Iki gikorwa cyabereye imbere y’abakinnyi bagenzi be ndetse n’abatoza ba APR FC, aha kandi hari n’umuyobozi wa APR FC Maj Gen MK MUBARAK wanibukije abakinnyi basigaye ko basabwa kugaragaza imyitwarire myiza igihe cyose.

Aha kandi umuyobizi Maj Gen MK MUBARAK yabwiye abakinnyi ko APR FC nk’ikipe y’Ingabo isabwa kuba intangarugero mu yandi ma kipe ndetse no mu muryango Nyarwanda.

Si ubwa mbere uyu mukinnyi afatirwa ibihano nk’ibi kuko ubwo hari tariki ya 3 Nzeri 2020 nabwo yahagaritswe bitewe no kutubahiriza gahunda y’umutoza.

Bukuru Christopher asezerewe mu mwiherero w’ikipe ya APR FC ku ncuro ya kabiri kuva ayigezemo tariki ya 21 Kanama 2019 avuye mu ikipe ya Rayon Sports.