Umugaba mukuru w’inyeshyamba za Antibalaka zo muri Centrafrica, Gen Pinho, kuri uyu wa Gatatu, itariki 16 Gicurasi 2018 yafatiwe mu gace ka Kanzau, muri Teritwari ya Bondo, ho mu Ntara ya Bas-Uele muri Repubulika iharanira Demokarasi ya Congo, aho umuvugizi w’ingabo muri FARDC avuga ko abarwanyi be bagera muri 30 nabo bishyize mu maboko y’ingabo za Congo buri wese afite imbunda ye.
Iyi nkuru dukesha Radio Okapi iravuga ko Gen Pinho yavumbuwe n’ingabo za Congo, ahantu hacumbikiwe impunzi zikomoka muri Centrafrica kuwa gatatu, ku isaha ya 10h08 nk’uko byemejwe n’umuvugizi w’ingabo, Capt. Carlos Kalombo.
Kuri we, ngo uyu mugaba mukuru wa Antibalaka, umutwe ugizwe n’inyeshyamba z’abakirisitu zihora zihanganye n’undi ugizwe n’abasilamu witwa Seleka, yahungiye muri aka gace nyuma yo gukozanyaho n’ingabo za Congo, FARDC.
Capt Kalombo akaba avuga ko iteka iyo izi nyeshyamba zisumbirijwe iwabo muri Centrafrica zisanga zihanganye n’ingabo za Congo na none iyo zinjiye ku butaka bw’iki gihugu..
Nyuma y’itabwa muri yombi rya Gen Pinho nk’uko inkuru ikomeza ivuga, abarwanyi be 38 bari bitwaje ibirwanisho byabo nabo bahise bishyikiriza ingabo za FARDC, aho ngo bazajyanwa ku buyobozi bukuru bw’ibikorwa bya gisirikare muri Uele.
Aha ngo niho umukuru w’ingabo muri iki gice, Gen de Brigade Isaac Kisebwe Lamuseni, ashobora kuzafata icyemezo cyo koherereza aba barwanyi ba Antibalaka ubuyobozi bukuru bw’ingabo.
Mu ntangiriro z’uyu mwaka, abarwanyi batatu ba Antibalaka na none bakaba barishyize mu maboko y’igisirikare cya Congo boherezwa I Kinshasa, aho na n’ubu hakigwa uko basubizwa mu gihugu cyabo.
