Perezida Kagame uri mu ruzinduko rw’akazi rw’iminsi ibiri muri Zambia, yasuye uruganda rukora ibyuma ruherereye mu Mujyi wa Kafue rwitwa Universal Mining & Chemical Industries Ltd.
Uru ruganda ruzwi ku izina rya Kafue Steel Plant rukoresha abakozi barenga igihumbi ndetse rwagize uruhare runini mu guhangira benshi imirimo no kugabanya ubukene muri aka gace.
Imirimo yarwo yatangiye ku bwa Perezida Levy Mwanawasa mu 2006, mu gihe ibikoresho by’ibyuma byose byakoreshwaga muri iki gihugu byavanwaga muri Afurika y’Epfo ariko ubu byarahindutse ibyinshi bikorerwa imbere mu gihugu.
Uru ruganda rufite intego yo guhaza isoko ryo muri Zambia no mu Karere ka Afurika y’Amajyepfo aho rwiyemeje kujya rutunganya ibyuma bingana na toni ibihumbi 200 ku mwaka.
Rushongesha ibyuma bishaje rukabikoramo ibindi bishya, ndetse ni rumwe mu zikoresha ikoranabuhanga ryo ku rwego rwo hejuru mu guhangana n’ingaruka zaterwa n’imyuka iruturukamo ishobora kwangiza ikirere.
