Gisagara Volleyball Club yegukanye igikombe cya GMT mu bagabo naho RRA Women Volleyball Club icyegukana mu bagore.

Imikino yo kwibuka kwibuka ku nshuro ya 27 abari abanyamuryango ba Volleyball bazize Jenoside yakorewe Abatutsi mu Rwanda mu 1994 yasojwe mu mpera z’icyumweru twarangije aho mu kiciro cy’abagbo ikipe ya Gisaga VC yegukanye igikombe itsinze REG VC mu bagabo, ni mu gihe ikipe ya Rwanda Revenue Authority VC yatsinze ikipe ya APR VC ku mukino wa nyuma.

Ni imikino yatangiye kuwa gatanu tariki ya 25 Kamena 2021 ibera muri NPC, Petit Stade i Remera ndetse no muri Kigali Arena.

Mu bagabo, ikipe ya Gisagara yegukanye igikombe itsinze ikipe ya REG VC amaseti 3-1 kimwe no mu bagore ikipe ya Rwanda Revenue Authority Women Volleyball Club yatsinze amaseti 3-1 ikipe ya APR Women Volleyball Club.

Mu bagabo kandi ikipe ya UTB VC yegukanye umwanya wa gatatu nyuma yo gutsinda APR VC, naho mu bagore ikipe ya Nairobi Water isoza ku mwanya wa gatatu.

Mu gutanga ibihembo, Gisagara VC yahawe igikombe na miliyoni ebyiri z’amafaranga y’u Rwanda (2,000,000 FRW) mu gihe REG VC yahawe miliyoni imwe (1,000,000 FRW) naho UTB VC ifata ibihumbi magana atanu (500,000 FRW).

Mu cyiciro cy’abagore naho RRA WVC yahawe igikombe na miliyoni ebyiri z’amafaranga y’u Rwanda (2,000,000 FRW), APR WVC ihabwa miliyoni imwe (1,000,000 FRW) naho Nairobi Water ifata ibihumbi magana atanu (500,000 FRW).