Kinshasa: Impanuka y’indege ya gisirikare yahitanye abagera kuri 30

Indege ya gisirikare itwara abantu n’imizigo y’igihugu cya Kongo yakoze impanuka hafi ya Kinshasa kuri uyu wa Gatandatu ihitana abatari bake.

Iyi ndege yo mu bwoko bwa Antovov, yari itwaye abantu benshi nk’uko AFP kibitangaza. Iyi ndege ngo yahanutse igeze mu gace ka Nsele gaherereye mu birometero 100 mu burasirazuba bwa Kinshasa umurwa mukuru wa Repuburika iharanira Demokarasi ya Congo.

Umutegetsi wo muri aka karere impanuka yabereyemo yabwiye AFP dukesha iyi nkuru ko nta muntu warokotse mu bari muri iyi ndege. Iyi ndege kandi yarimo ikipe y’abarusiya, yari inatwaye imodoka 2 ndetse n’intwaro ndetse na bamwe mu basirikare.

Umuntu ukora muri Etat majoro ya Congo utatangarijwe izina yavuze ko iyi ndege yari itwaye hagati y’abantu 20 na 30 ubwo yahagurukaga ku kibuga cy’indege cya Ndolo i Kinshasa.

Umutangabuhamya wabonye iyi ndege ihanuka yabwiye AFP ko yabonye ihanuka mu kirere ahagana saa 9:00 gusa ngo nta mwotsi yigezea abona uzamuka aho iyo ndege yaguye.