Umunyamabanga mukuru wa APR FC, Kalisa Adolphe bakunze kwita Camarade wari kumwe n’iyi kipe mu gihugu cya Mali agarutse mu Rwanda igitaraganya nyuma yo kumenya ko yagize ibyago agapfusha umubyeyi we watabarutse mu ijoro ryakeye.
Kalisa Adolphe uvukana na Jules Kalisa wigeze kuba Umunyamabanga wa FERWAFA, babuze Mama ubabyara witabye Imana mu ijoro ryo kuri uyu wa Mbere tariki 5 Werurwe 2018.
Umuvugizi w’ikipe ya APR FC, Kazungu Claver yavuze ko bakimara kumenya iyo nkuru mbi y’ibyago, byabaye ngombwa ko Camarade agaruka I Kigali kwifatanya n’abo mu muryango we mu kababaro no gusezera kuri uyu mubyeyi washizemo umwuka.
APR FC yahagurutse I Kigali mu rukerera rwo kuwa Mbere aho berekeje muri Mali mu mukino uzabahuza na Djoliba FC kuri uyu wa Gatatu tariki 7 Werurwe 2018, aho bazaba bakina imikino y’igikombe Nyafurika ya CAF Confederation Cup.
