Perezida Yoweri Museveni wa Uganda yasabwe n’abayobozi bo mu Karere ka Kisoro, kamwe mu dutuwe cyane n’abayoboke ba NRM, kuziyamamariza manda ya 7 mu matora ateganyijwe mu 2021.
Umuyobozi wungirije wa NRM muri Kisoro, Ramathan Ndikuyeze akaba n’umuyobozi muri aka karere, yavuze ko Museveni akwiye kongera guhatana kuko agishoboye.
Yashimangiye ko Perezida Museveni, ari nawe chairman wa NRM, agikomeye ahubwo ananizwa n’abantu bakorana.
Naho ku kijyanye n’abatavuga rumwe n’ubutegetsi, Ndikuyeze yavuze ko kuri ubu bari mu bihe bibi birimo amacakubiri imbere muri yo n’ubugambanyi.
Iyi nkuru dukesha Chimpreports iravuga ko ibi Ndikuyeze yabitangarije kuri uyu wa Gatandatu ushize mu bukwe bw’umuhungu we, Ali Turinayo na Sarah Irankunda bwabereye ahitwa Chahi, muri Kisoro.
Mu ijambo rye yavugiye aha, Dr Chris Baryomunsi, Umunyamabanga wa leta ushinzwe imiturire, akaba yari ahagarariye Perezida Museveni, yahamagariye abayoboke ba NRM gusigasira imbaraga ishyaka ryabo rifite binyuze mu bumwe no gufatanya.
Yasabye kandi abahagarariye urubyiruko rwa Kisoro kwitabira ibikorwa bigamije iterambere ryabo.
Mu ijambo yari yageneye uyu munsi ryasomwe n’uyu munyamabanga wa leta, Perezida Museveni yashimiye Ndikuyeze ku kuba yaratoje abana be bose kuba abaturage bafite inshingano.
Yasabye kandi urubyiruko kubahana no gukora cyane ngo babungabunge ahazaza h’imiryango yabo.
Perezida Museveni akaba yaratanze inka 10 nk’intwererano kuri aba bageni.
