Rutahizamu w’Ikipe y’Igihugu y’u Rwanda, Amavubi, Meddy Kagere yafashije ikipe ye ya Simba Sports Club yo muri Tanzania kwitwara neza mu mukino wa mbere w’amatsinda ya CAF Champions league y’uyu mwaka atsinda bibiri muri bitatu batsinze JS Saoura yo muri Algeria.
Abakunzi b’umupira w’amaguru muri Tanzania cyane abafana ba Simba SC baboneye Meddie Kagere izina rishya kubera kubatsindira ibitego byinshi kandi akabibona ku mikino ikomeye. Ubu yiswe ‘Machine ya Kinyarwanda’.
Simba SC niyo kipe rukumbi yo mu karere ka Afurika y’i Burasirazuba iri mu matsinda ya CAF Champions League. Mu mukino ufungura amatsinda yahanganye na Jeunesse Sportive de la Saoura yo muri Algeria mu mukino ubanza wabereye kuri Uwanja wa Taifa kuri uyu wa Gatandatu tariki 12 Mutarama 2019.
Umutoza wa Simba SC, Patrick Aussems, ntabwo yagiriye icyizere abakinnyi babiri b’abanyarwanda kuko kapiteni w’Amavubi Haruna Niyonzima na rutahizamu Meddie Kagere bombi babanje ku ntebe y’abasimbura.
Yaje gukora impinduka hakiri kare, Meddie Kagere yinjira mu kibuga ku munota wa 37 asimbuye kapiteni John Raphael Bocco binatanga umusaruro kuko Simba SC yahise ifungura amazamu ku munota wa gatatu w’inyongera kuko iminota 45 y’igice cya mbere yarangiye ari 0-0.
Igitego cya mbere cyatsinzwe na rutahizamu w’umunya-Uganda, Emmanuel Arnold Okwi. Mu gice cya kabiri Meddie Kagere yatsinze ibitego bibiri byashimangiye intsinzi ya Simba SC, kimwe ku munota wa 52 ikindi ku munota wa 67.
Uyu mukino warangiye Simba SC itsinze Jeunesse Sportive de la Saoura 3-0 watumye ihita iyobora itsinda ‘E’ n’amanota atatu n’ibitego bitatu izigamye, ikurikiwe na National Al Ahly yo mu Misiri yo yatsinze AS Vita Club 2-0.
