Nyuma yaho ishyirahamwe ry’umupira w’amaguru mu Rwanda, FERWAFA, itangarije ko shampiyona izatangira tariki ya 19 Kanama 2022, amakipe amwe n’amawe yatangiye imyitozo yitegura iyi shampiyona izasozwa muri Kamena 2023.
Nk’uko amwe mu makipe yamaze kubitangaza, imyiteguro y’iyi shampiyona irarimbanyije by’umwihariko nko ku ikipe ya Gorilla FC yo imaze hafi icyumweru kirenga itangiye imyitozo, Gasogi United, Musanze FC ndetse na AS Kigali yo yatangiye imyitozo muri iki cyumweru.
Ikipe ya AS Kigali isanzwe ikorera kuri Sitade ya Kigali i Nyamirambo yatangiye kuwa mbere w’iki cyumweru , mu myitozo yari iyobowe n’umutoza mukuru wayo ariwe Casa Mbungo Andre ndetse n’umutoza umwungirije ariwe Mbarushimana Shaban uherutse gutandukana na Gasogi United.
Ni imyitozo kandi yagaragayemo abakinnyi bashya iyi kipe yasinyishije harimo Akayezu Jean De Dieu wavuye muri Etincelles FC, Munyarugabo Moise wahoze muri Mukura VS, Rucogoza Eliassa wavuye muri Bugesera FC ndetse na Dusingizimana Gilbert wavuye muri Kiyovu SC.
Mu ikipe ya Musanze yashimangiye ko mu myitozo yabo yitegura shampiyona y’u Rwanda, yongeyemo amaraso mashya y’abakinnyi barimo Ntijyinama Patrick wahoze muri Espoir, Nsengiyumva Isaac wari muri Rayon Sports, Amani Hakizimana na Dufitumufasha Jean Pierre.
Nubwo aya makipe ari amwe muyatangiye imyitozo, andi arimo APR FC, Rayon Sports, Kiyovu Sport Club, Police FC na Mukura VS ntabwo aratangira kwitegura uyu mwaka utaha w’imikino.
Ni mugihe nko ku ikipe ya Bugesera yo itangira imyitozo kuri uyu wa gatatu mu myitozo iri bukoreshwe na Mutambirwa Djabil kuko umutoza mukuru wayo Ndayiragije Etienne yari yagiye mu biruhuko mu gihugu cy’amavuko cy’i Burundi.
