Kuri iki cyumweru tariki ya 28 Ugushyingo 2021, mu mujyi wa Kigali hasojwe irushanwa ryiswe Taxpayers Appreciation 2021 ryateguwe n’ikigo cy’imisoro n’amahoro ku bufatanye n’ishyirahamwe ry’umukino nyarwanda wa Volleyball, ni irushanwa mu bagabo ryegukanywe na Gisagara VC naho mu bagore ryegukanwa na Rwanda Revenu Authority VC.
Taxpayers Appreciation 2021 ni irushanwa ryari ryitabiriwe n’amakipe yo mu byiciro byombi mu bagabo ndetse no mu kiciro cy’abagore.
Mu bagabo hitabiriye APR VC, Union VC, Gisagara VC, Kigali Volleyball Club, REG VC ndetse na Kirehe VC .
Mu bagore hari hitabiriye amakipe arimo IPRC Huye, Ruhango VC, Kigali Volleyball Club, APR VC, Rwanda Revenu Authority VCndetse na Union VC.
Nyuma y’amajonjora yakinwe ku wa gatandatu tariki ya 27 Ugushyingo 2021, mu bagabo Union VC, Gisagara VC, APR VC ndetse na Kigali Volleyball Club zahise zibona itike yo kugera muri kimwe cya kabiri cy’iri rushanwa.
Aha imikino yakinwe ku cyumweru ibera muri Kigali Arena, byarangiye ikipe ya Gisagara igeze ku mukino wa nyuma aho yahuye na APR VC, ni umukino kandi warangiye ikipe ibarizwa mu karere ka Gisagara itwaye igikombe nyuma yo gutsinda amaseti atatu kuri imwe ya APR VC (17-25, 25-14, 25-21, 25-21).
Mu kiciro cy’abagore ho ikipe ya Rwanda Revenu Authority VC yatwaye igikombe itsinze Union VC amaseti 3-2 (26-24 , 16 -25, 16-25, 25-15, 15-10.
Usibye ibikombe byatanzwe, hanahembwe abakinnyi bitwaye neza muri iri rushanwa aribo:Cedric (APR VC), Best Server: Olivier (UVC), Best Receiver: Flavien (Gisagara VC), Best Attacker: Venuste (APR VC), Best Blocker: Ronald (Gisagara VC), Best Libero: Sadru (APR VC) naho umukinnyi w’irushanwa ryose yabaye Kathbart (Gisagara VC).
