Abakobwa bifuza bazatoranywamo Nyampinga w’u Rwanda 2018 batangiye gutoranywa ndetse aba mbere bamaze gutsinda ijonjora ryabereye mu Karere ka Musanze.
Igikorwa cyo gutoranya abakobwa bujuje ibisabwa bemerewe guhatanira Miss Rwanda 2018 cyatangiye kuri uyu wa Gatandatu tariki ya 13 Mutarama 2018 mu Ntara y’Amajyaruguru.
Mu bakobwa 19 biyandikishije mu Ntara y’Amajyaruguru abagera kuri 13 nibo bageze ahabereye ijonjora; aba bakuwemo icumi bemerewe guhatana mu ijonjora ry’ibanze ryasojwe akanama nkemurampaka gatoyemo batandatu gusa.
Sandrije Isheja wari uhagarariye akanama nkemurampaka yavuze ko ibyashingiweho mu gutanga amanota harimo “uburanga, ubwenge n’umuco”. Uburanga bwari bufite amanota 25%, ubwenge bwahawe amanota 45% hanyuma uburyo umukobwa yatondekaga ibyo avuga bihabwa amanota 30%.
Abatsinze ni Usanase Shamim Irene, Umutoniwase Paula, Ishimwe Belly Stecy, Irebe Natacha Ursule, Umuhoza Linda na Ingabire Divine.
Irebe Natacha Ursule, umwe mu batsinze yavuze ko nyuma yo kurenga ijonjora ryo mu Ntara ngo agiye gukomeza amasengesho no kwigirira icyizere kuko ari byo byamufashije gutsinda.
Yagize ati “Ubu igikurikiraho kurushaho ni ugukomeza icyizere nigiriye kandi ngakomeza isengesho kuko Imana niyo ikora byose.”
Miss Rwanda2018 irimo impinduka, mu majonjora hazatoranywa abakobwa 30 mu gihugu hose aho kuba 25 nk’uko byari bisanzwe nyuma hakazakorwa irindi jonjora rizasigazamo abakobwa 20 bazajya mu mwiherero aho kuba 15 nk’uko byagendaga mu myaka yashize.
Ibikorwa byo guhitamo abazaserukira Intara byakomereje mu Burengerazuba bw’u Rwanda mu Mujyi wa Rubavu kuri uyu wa 14 Mutarama 2018.
1.Umuhoza Linda
2.Usanase Shamim Irene
3. Irebe Natacha Ursule, afite ibiro 66 akareshya na metero 1.72
4. Umutoniwase Paula, afite ibiro 65 akareshya na metero 1.72
5. Ingabire Divine, afite ibiro 55 akareshya na metero 1.73
6.Ishimwe Belly Stecy
