Mu mpera z’iki cyumweru ku Kigali Pele Stadiim hazabera imikino yo guhatanira miliyoni 6 z‘amafaranga y’u Rwanda mu irushanwa ryo guhatanira igikombe cy’Intwari 2024.
Iyi mikino izakinwa mu byiciro bibiri mu Bagabo n’Abagore, ni imikino izatangira kuri iki Cyumweru muri 1/2 izasozwe tariki ya mbere Gashyantare 2024.
Mu kiciro cy’abagabo amakipe ane yabaye aya mbere mu gice kibanza cya shampiyona y’u Rwanda 2023-2023 niyo azitabira iri rushanwa, naho mu kiciro cy’Abagore hazitabira amakipe abiri ariyo As Kigali na Rayon Sports.
Mu bagabo imikino iteganyijwe ko kuri ki cyumweru guhera ku isaha ya Saa Cyenda ikipe ya APR FC izakina na Musanze FC naho ku isaha ya Saa kumi n’Ebyiri ikipe ya Police FC izahura na Rayon Sports.
Amakipe azatsinda azakina umukino wa nyuma w’igikombe cy’intwari tariki ya mbere Gashyantare 2024, ni umukijo uzabanzirirwa n’uzahuza Rayon Sports WFC na AS Kigali WFC.
Ikipe izaba iya mbere mu kiciro cy’Abagabo izahembwa Miliyoni 6 z’Amafaranga y’u Rwanda, iya kabiri ihabwe Miliyoni 3.
Mu Bagore iya mbere izahabwa Miliyoni 4 z’amafaranga y’u Rwanda naho iya kabiri izahabwa miliyoni 2.
