Kuri uyu wa kane tariki 25 Ukwakira, Urukiko rwisumbuye rwa Gasabo rwaburanishije mu mizi urubanza ruregwamo Abanyarwanda batatu bashinjwa kwambura undi munyarwanda miliyoni 2$ mu bwambuzi bushukana, ibyo baregwa ngo byabereye muri Uganda.
Abaregwa ni Rwasamanzi Emile usanzwe ari umucuruzi, Ndahayo Theodore na Rugema Amani, baregwa n’uwitwa Kanobayire Thierry wari umukozi mu ruganda rw’itabi rwa Tribert Ayabatwa Rujugiro.
Kuri uyu wa kane Urukiko Rwisumbuye rwa Gasabo rwahereye ku nzititizi zatanzwe na Me James Nuwagaba uhagarariye Kanobaire uvuga ko yakorewe icyaha.
Me Nuwagaba yasabye ko Urukiko rusubika urubanza kubera ko Kanobayire yatanze ikirego kihutirwa gihagarika amarangiza rubanza y’ikemezo cy’Urukiko Rukuru rwanzuye ko Leta (Polisi y’Igihugu) isubiza Rwasamanzi Emile amafaranga ye ibihumbi Magana abiri na cumi n’icyenda y’amadolari (219 000$) ndetse akanahabwa indishyi.
Me Nuwagaba yabwiye Urukiko ko ariya mafaranga ari mu bwishyu bw’agera kuri miliyoni 2$ Kanobaire Thierry avuga ko yambuwe kandi ngo abifitiye ibimenyetso. Ndetse ngo na dosiye y’Ubushinjacyaha ibivugamo ko ariya mafaranga ari mu yo Rwasamanzi Emile yambuye Kanobaire.
Ku ruhande rw’abaregwa, Me Rwagatare Janvier yabwiye Urukiko ko bidasanzwe kuba Urubanza nshinjabyaha rwasubikwa hagendewe ku byifuzo byo gutegereza umwanzuro uzava mu rubanza mbonezamubano, avuga ko bidashoboka.
Yavuze ko Ubushinjacyaha n’uhagarariye Urega mu rubanza bashaka gukuraho ikemezo cy’Urukiko Rukuru cyo gusubiza Emile Rwasamanzi amafaranga yatsindiye muri 2016 kandi umwanzuro w’urukiko ari itegeko.
Ati “Urukiko rwafata umwanzuro ariko turagendera ku ngingo ya 121 y’Igitabo cy’Amategeko Manabyaha mu Rwanda, dusabeko Emile (Rwasamanazi) watsinze urubanza rwa mbere afungurwa agakurikiranwa ari hanze aho kugira ngo bajye bafata umuntu bamufungishe, bamupfinagaze, bo bari hanze, ubwo na Emile ararekurwa turahari tuzaruburana.”
Ubushinjacyaha buhawe ijambo bwavuze ko Urukiko rwasuzuma icyifuzo cyatanzwe n’uwunganira urega muri uru rubanza.
Hatabayeho kwiherera, Umucamanza yahise avuga ko nta mpungenge abona ku nzitizi zatanzwe yanzura ko urubanza rukomeza kuburanwa mu mizi.
Ku burana indi nzitizi
Me Rwagatare Janvier yahise asaba Urukiko ko bifuza ko uwo yunganira ari we Emile Rwasamanzi atandukanywa na Rugema Amani uvugwa mu yindi dosiye y’ibyaha byabereye mu Rwanda, agasigara mu rubanza areganwa na Ndahayo Theodore ku bijyanye n’uru rubanza byabereye muri Uganda.
Umucamanza yagiye aha ijambo buri wese mu barega n’ababunganira. Yaba ari Ndahayo n’umwuganira nadetse na Rugema Amani udafite umwunganizi mu Rukiko bavuga ko na bo bifuza ko dosiye zabo zitandukana, gusa abasaba Urukiko Rukuru kubaha itariki ya bugufi bazaburaniraho igihe rwaba rumaze guca urubanza rwa mbere kuko ngo bamaze amezi 4 bafunzwe.
Ubushinjacyaha n’Uhagarariye Urugegwa bo bavuze ko imanza z’ebyiri ziregwamo aba bantu batatu zitata (urwa mbere Emile Rwasamanzi areganwa na Ndahayo Theodore, urubanza rwa kabiri Emile Rwasamanzi arureganwamo na Rugema Amani).
Urukiko Rwisumbuye rwa Gasabo rwanzuye ko rugiye kwiherera rukazasoma umwanzuro wwarwo tariki 31 Ukwakira 2018 ku isaha ya saa kenda.
Imiterere y’Urubanza muri macye
Mu 2016 Emile Rwasamanzi yafashwe n’inzego z’ubugenzacyaha (Polisi), afatanwa ibihumbi 200$. Nyuma y’iperereza Rwasamanzi yararekuwe, ariko ntiyasubizwa amafaranga yafatanywe ku mpamvu atazi.
Mu 2018, Rwasamanzi yaregeye Urukiko Rukuru asaba gusubizwa amafaranga ye ibihumbi 200$ arega Leta (Polisi y’Igihugu), ndetse arayitsinda itegekwa kwishyura umwunganizi no gutanga amagarama y’urubanza.
Habura iminsi mike ngo Urukiko rusome ikemezo cyarwo, Emile Rwasamanzi yatawe muri yombi bwa kabiri, arafungwa (hashize amezi ane), abwirwa ko habonetse umuntu witwa Kanobayire Thierry wemeza ko ariya mafaranga ibihumbi 200$ ari mu yo yambuwe na Emile Rwasamanzi amutekeye umutwe muri Uganda.
Ngo Kanobaire Thierry wari umukozi mu ruganda rw’itabi rw’umuherwe Rujugiro yahaga Emile Rwasamanzi ariya mafaranga mu byiciro. Ngo mbere yamuhaye ibihumbi 600$, nyuma amahu ibihumbi 500$ kurea ageze kuri miliyoni ebyiri z’amadorari.
Gusa uyu uregwa avuga ko atazi uyu Kanobayire umurega.
Kanobaire wabonetse Urukiko Rukuru rwanzuye ko Emile Rwasamanzi asubizwa amafaranga ye, yatanze Ikirego kihutirwa cyo gutambamira ikemezo cy’Urukiko Rukuru. Urubanza rw’iki kirego ruzaburanishwa tariki ya 1 Ugushyingo 2018 mu Rukiko Rukuru i Kigali.
Emile Rwasamanzi n’abo bareganwa bakurikiranyweho ibyaha bitatu, icy’ubwambuzi bushukana, kurema umutwe w’abagizi ba nabi no kwigwizaho umutungo.
