Ku mugoroba wo kuri uyu wa mbere tariki ya 19 Ukuboza 2022 nibwo ubuyobozi bw’ikipe ya Espoir FC bwatangaje ko bwamaze guhagarika umutoza Bisengimana Justin azira umusaruro muke agejeje kuri iyi kipe.
Nk’uko byagaragaye mu ibaruwa iyi kipe yashyize hanze ibinyujije ku rubuga rwayo rwa Twitter ko uyu mutoza asebya kandi ubuyobozi bw’ikipe bitewe n’uko umusaruro wayo ukomeje kubura.
Ubuyobozi bwa Espoir FC bwamwandikiye ibaruwa igira iti “Dushingiye ku masezerano wagiranye a ESPOIR FC ku wa 28/07/2022 mu shingano zikubiye muri ayo masezerano ku ngingo yayo ya kabiri, Dushingiye ku musaruro mubi ukomeje kugaragara mu ikipe, aho kugeza ubu ikipe ifite amanota 7/42 bingana na 16.6%, aho mu mikino 14 ikipe imaze gukina watsinzemo umukino umwe, ukanganya imikino ine, ugatsindwa imikino icyenda,
Dushingiye ku mikoranire yawe n’abo mufatanyije imirimo mu ikipe, aho ujya mu itangazamakuru ugasebya Ubuyobozi bw’ikipe ndetse n’abakinnyi ko badashoboye kandi waragize uruhare rusesuye mu gushaka abakinnyi 11, ibi bikaba bigaragaza isura mbi y’ikipe;
Turakumenyesha ko uhagaritswe ku kazi by’agateganyo ko gutoza ikipe nk’umutoza Mukuru uhereye tariki ya 20/12/2022 kugeza tariki ya 19/01/2023.”
Nyuma y’ibi bahise bandikira Bipfubusa Methode wari umutoza w’abanyezamu ko ahawe imirimo yo gutoza iyi kipe yo mu karere ka Rusizi.
Iyo baruwa iragira iti “ Turakumenyesha ko Ubuyobozi bwa Espoir FC buguhaye inshingano ku buryo bw’agateganyo zo gutoza ikipe ya ESPOIR FC nk’umutoza Mukuru kuva tariki ya 20/12/2022 kugeza tariki ya 19/01/2023 izo nshingano ukazakomeza kuzibangikanya n’izo warusanganywe.”
Umutoza Bisengima Justin asezerewe muri iyi kipe nyuma yaho yagiye anyura mu makipe atandukanye ya hano mu Rwanda arimo Police FC, Gicumbi FC, Sunrise FC ndetse na Rutsiro FC.
