Imikino isoza iyo mu itsinda rya kabiri ry’igikombe cya Afurika cya 2017 kiri kubera muri Gabon, yasize ikipe y’igihugu ya Algeria isezerewe, ni nyuma yo kunganya na Senegal ibitego 2-2 kuri uyu wa Mbere tariki ya 23 Mutarama 2017.
Algeria yatangiye isatira bikomeye Senegal yari yaruhukije abakinnyi benshi babanza mu kibuga, yabonye igitego cya mbere ku munota wa 10 w’umukino, gitsinzwe na Islam Slimani, ariko Senegal yishyurirwa na Papa Kaliou Diop ku munota wa 44 w’umukino.
Islam Slimani yaje gutsindira Algeria igitego cya kabiri ku mupira wahinduwe na Riyad Mahrez ku munota wa 52 w’umukino, ariko ku makosa ya ba myugariro ba Algeria, Moussa Sow yishyurira Senegal nyuma y’umunota umwe gusa.
Algeria yakabaye yabonye igitego kiyihesha intsinzi, ariko uburyo bwabonetse ku bakinnyi bayo barimo; Slimani waje kuvunika agasimbuzwa, Bounedjah na Gouedioula ntibwatanga umusaruro, umukino urangira amakipe yombi anganyije 2-2.
Mu wundi mukino wabaraga kuri stade d’Angondge,i Libreville, Tunisia yatsinze Zimbabwe ibitego 4-2, mu gihe igice cya mbere cyari cyarangiye ari ibitego 4-1.
Senegal yasoje imikino yo mu itsinda rya mbere iyoboye n’amanota 7, Tunisia ifite amanota 6 ku mwanya wa kabiri mu gihe Algeria yasezerewe ifite amanota 2 naho Zimbabwe itaha ifite inota rimwe gusa.
Muri 1/4, Senegal izahura na Cameroun yabaye iya kabiri mu itsinda rya mbere, Tunisia yo izahura na Burkina Faso yabaye iya mbere mu itsinda rya mbere.
Kuri uyu wa Kabiri tariki ya 24, imikino y’iri rushanwa irakomeza, aho Congo Kinshasa irakina na Togo, Maroc ikina na Ivory Coast mu mikino isoza iyo mu itsinda rya gatatu yombi irabera rimwe (21:00).
Ikipe ya Algerie
