Igikombe cya Afurika cy’uyu mwaka kiri kubera mu Misiri gikomeje kugaragaramo ugutungurwa ku makipe akomeye, aho nyuma ya Maroc yakuwemo na Bénin, Cameroun ifite irushanwa riheruka yasezerewe na Nigeria mu gihe Misiri iri mu rugo yakuwemo na Afurika y’Epfo mu mikino ya 1/8 yabaye kuri uyu wa Gatandatu.
Afurika y’Epfo yazamutse mu matsinda idahabwa amahirwe menshi dore ko yatsinzwe na Côte d’Ivoire na Maroc, gusa yaraye ibabaje ibihumbi 70 by’Abanyamisiri bari kuri Stade Mpuzamahanga ya Cairo, ubwo yatsindaga Les Pharaohs igitego 1-0.
Percy Tau ni we wagerageje uburyo bwa mbere bugana ku izamu ku munota wa kabiri, umupira awutera hejuru kure mu gihe Mohamed Salah yaje kugerageza gutera umupira adahagarite, ugaca ku ruhande rw’izamu.
Ku munota wa 21, Afurika y’Epfo yabonye umupira w’umuterekano inyuma gato y’urubuga rw’amahina, uterwa na Percy Tau ku bw’amahirwe ya Misiri, umunyezamu El Shenawi arirambura awushyira muri koruneri. Nyuma y’iminota ibiri, Misiri yakoze contre-attaque, Mohamed Salah atanze umupira kuri Trezeguet, awutera mu izamu n’ishoti ridakomeye ryafashwe n’umunyezamu Ronwen Williams.
Misiri yatangiye igice cya kabiri iri hejuru, irema uburyo bubiri bwashoboraga kuyihesha igitego, igorwa n’umunyezamu Williams mu gihe na El Shenawi yafashe umupira watewe na Thembinkosi Lorch ku munota wa 71.
Habura iminota itanu ngo umukino urangire, Afurika y’Epfo yaciye mu rihumye Misiri yari yazamutse ijya gushaka igitego, ikora contre-attaque maze Lebo Mothiba acomekera umupira Thembinkosi Lorch warobye umunyezamu Mohamed El Shenawi wari wasohotse, atsinda igitego cyahesheje igihugu cye kugera muri ¼.
Undi mukino wa 1/8 wari wabanje, Nigeria yasezereye Cameroun ifite igikombe cya Afurika giheruka, iyitsinze ibitego 3-2.
Odion Ighalo yafunguye amazamu ku ruhande rwa Nigeria ku munota wa 19, ubwo yari aherejwe na myugariro Kennth Omeruo mu gihe Cameroun yishyuye ku wa 40, Stephane Bahoken aherejwe na Christian Bassogog.
Nyuma y’iminota itatu, Clinton N’jie yatsindiye Cameroun igitego cya kabiri, ariko Odion Ighalo na Alex Iwobi batsindira Nigeria ibindi bitego ku munota wa 63 n’uwa 66, Cameroun yaherukaga kwegukana iri rushanwa mu 2017 irasezererwa.
Imikino ya 1/8 irakomeza kuri iki Cyumweru aho Madagascar yitabiriye iri rushanwa bwa mbere ikanazamuka iyoboye itsinda ryarimo Nigeria, yisobanura na Repubulika Iharanira Demokarasi ya Congo saa 18:00, mu gihe Algérie iri mu makipe ahabwa amahirwe, ihura na Guinée yazamutse iri mu makipe ane ya gatatu yitwaye neza. Uyu mukino uratangira saa 21:00.
Musengimana Ruhango Mbuye Rugarama
African Yepfo Niyo Izegukana Igikombe