Kuri uyu wa kabiri tariki ya 12 Ukwakira 2021 nibwo hamenyekana amakipe abiri agomba gukina ikiciro cya mbere mu bagabo mu mwaka w’imikino wa 2021-2022, ni nyuma yaho hategerejwe isozwa ry’imikino ya kimwe cya kabiri hamenyekana amakipe azakina umukino wa nyuma mu kiciro cya kabiri mu Bagabo.
Imikino yo kwishyura irakinwa uhereye ku isaha ya saa muani z’amanywa, mu mikino ibanza yabaye mu mpera z’icyumweru gishize ikipe y’Amagaju yo mu ntara y’amajyepfo yanganyije na Etoile de l’Est igitego kimwe kuri kimwe naho mu karere ka Bugesera Heroes FC yatsinzwe na Gicumbi FC igitego kimwe ku busa.
Imikino yo kwishyura iteganyijwe ko mu Karere ka Ngoma mu ntara y’i Burasirazuba, ikipe y’aka akarere ya Etoile de l’Est irakira ikipe y’Amagaju kuri ubu yaraye mu karere ka Kayonza yitegura uyu mukino wo kwishyura.
Naho mu karere ka Gicumbi ko mu ntara y’Amajyaruguru biteganyijwe ko Gicumbi FC iri buhakirire ikipe ya Heroes FC itaritwaye neza mu mukino ubanza yari yakiriye kuko yawutakaje ku gitego kimwe ku busa.
Biteganyijwe ko amakipe ari bukomeze muri kimwe cya kabiri azahurira ku mukino wa Nyuma ndetse akaba ari nayo makipe abiri azakina ikiciro cya mbere mu bagabo cya 2021-2022, aya makipe kandi niyo azasimbura ikipe ya AS Muhanga ndetse na Sunrise FC yamanutse mu kiciro cya kabiri mu mwaka w’imikino wa 2020-2021.
