Hatahuwe umugambi wajyanye muri Uganda, La Forge Fils Bazeye n’ushinzwe ubutasi muri FDLR

Bazeye yafatiwe ku mupaka wa Bunagana avuye i Kampala, ari kumwe na Lieutenant-Colonel Abega. Bombi bafashwe ku wa 15 Ukuboza.

Nk’uko Jeune Afrique yabitangaje, umwe mu bayobozi bakuru mu Ngabo za RDC yemeje ko bahise boherezwa i Kinshasa, aho bategereje kugezwa imbere y’ubutabera ngo baburanishwe ku byaha bakekwaho.

Yatangaje ko amakuru aturuka muri FARDC ahamya ko aba bagabo babiri, La Forge Fils Bazeye hamwe n’umuyobozi ushinzwe iperereza muri FDLR, bafashwe bavuye muri Uganda mu migambi yo guhungabanya umutekano w’u Rwanda.

Uyu watanze amakuru uri gukurikiranira hafi iyi dosiye yagize ati “Ibisobanuro byabo bigaragaza ko urugendo rwabo i Kampala rwari rugamije ibikorwa byinshi bibangamiye ubutegetsi bwa Kigali kandi ihuzabikorwa ryabo ryakorerwaga aharimo n’i Kampala.”

“Igiteye kwibazwa ni uko aba bayobozi bakuru muri FDLR bahuye n’abantu bakomeye b’i Kampala. Banahuye n’abandi bantu batavuga rumwe n’ubutegetsi bw’u Rwanda hagamijwe gutegura ibitero byinshi.”

Yakomeje avuga ko bijyanye n’amakuru akomeye bafite hamwe n’impamvu z’iperereza, abo bayobozi bahise bajyanwa i Kinshasa.

Biteganywa ko mu minsi ya vuba bazagezwa imbere y’ubutabera, ngo babazwe ku byaha birimo “guhonyora uburenganzira bwa muntu muri RDC no gutunga ikarita y’itora binyuranyije n’amategeko, kuko igenewe abanye-Congo gusa.”

Umuvugizi w’Ingabo za RDC, Major Guillaume Djike, yabwiye AFP ko abarwanyi bose ba “FDLR bagomba koherezwa mu Rwanda, n’aba bizakorwa.”

Aba bayobozi bafashwe mu gihe mu minsi ishize, abarwanyi ba FDLR bagabye igitero ku birindiro by’ingabo z’u Rwanda mu Karere ka Rubavu, zikabicamo abagera ku icyenda.

Umusirikare umwe w’u Rwanda niwe witabye Imana, mu gihe batatu bakomeretse.

Ibi kandi bibaye mu gihe hashize iminsi Uganda ishyirwa mu majwi ku guha icyuho ibikorwa bigamije guhungabanya umutekano w’u Rwanda, birimo no kuba icyo gihugu kiberamo ibikorwa bya RNC nko gushaka abantu binjizwa mu mitwe yitwaje intwaro.