Ijonjora ry’ibanze ry’abakobwa bifuza guhatanira ikamba rya Nyampinga w’u Rwanda uyu mwaka ryakomereje mu Ntara y’Uburengerazuba mu Mujyi wa Rubavu kuri iki Cyumweru tariki ya 14 Mutarama 2018.
Iki gikorwa cyo gutoranya abakobwa bujuje ibisabwa mu Ntara y’Uburengerazuba cyatangiye ku gicamunsi ahagana saa saba zirengaho iminota. Abakobwa babanje gupimwa no kubazwa ibyangombwa bisabwa ababishinzwe bareba imyaka, ubwenegihugu bwa buri mukobwa n’indi myirondoro ikenewe ku bitabira irushanwa.
Ugereranyije n’ubwitabire mu Ntara y’Amajyaruguru aho ijonjora ryatangiriye kuri uyu wa Gatandatu, mu Mujyi wa Rubavu hageze abakobwa umunani gusa mu gihe abiyandikishije muri aka gace ari icumi.
Intara y’Amajyaruguru yamaze kubona abakobwa bazayihagararira muri Miss Rwanda 2018. Abatsinze ni Usanase Shamim Irene, Umutoniwase Paula, Ishimwe Belly Stecy, Irebe Natacha Ursule, Umuhoza Linda na Ingabire Divine.
Umuyobozi w’Akanama nkemurampaka, Sandrije Isheja wari uhagarariye yavuze ko mu byo bari gushingiraho mu guhitamo abakobwa ari ingingo eshatu nkuru “uburanga, ubwenge n’umuco”. Uburanga bwari bufite amanota 25%, ubwenge bwahawe amanota 45% hanyuma uburyo umukobwa yatondekaga ibyo avuga bihabwa amanota 30%.
Miss Rwanda2018 irimo impinduka, mu majonjora hazatoranywa abakobwa 30 mu gihugu hose aho kuba 25 nk’uko byari bisanzwe nyuma hakazakorwa irindi jonjora rizasigazamo abakobwa 20 bazajya mu mwiherero aho kuba 15 nk’uko byagendaga mu myaka yashize.
Mu Ntara y’Uburengerazuba niho Mutesi Jolly[Miss Rwanda 2016] na Iradukunda Elsa[Miss Rwanda 2017] biyamamarije.
