Abagabo babiri bakekwaho kuba mu rubyiruko rw’ishyaka riri ku butegetsi mu Burundi ruzwi nk’Imbonerakure guhera mu mpera z’iki cyumweru gishize bafungiye mu nkambi y’impunzi ya Nakivale iri mu gihugu cya Uganda nyuma yo gufatwa bafata amafoto y’impunzi z’Abarundi zo muri iyi nkambi zijya mu gikorwa cyo kwibaruza.
Amakuru aturuka mu Nkambi ya Nakivale agera ku kinyamakuru RPA dukesha iyi nkuru, ngo umwe mu batawe muri yombi aba I Kampala, mu murwa mukuru wa Uganda. Mu gihe rero ngo kuri uyu wa Gatanu w’icyumweru gishize impunzi zajyaga kwibaruza, zabonye umusore uri gufotora ariko yibanda ku mpunzi z’Abarundi.
Nyuma yo kumukeka, yatawe muri yombi yamburwa telephone yakoreshaga basanga amaze koherereza ayo mafoto indi mpunzi y’Umurundi uba mu Nkambi ya Nakivale, wari wamaze kumushimira akazi arimo gukora.
Uwahaye iki kinyamakuru amakuru aragira ati: “Umwe mu bashinzwe kubarura yabonye hari umuntu wafataga amafoto buri kanya. Ubwo yabimenyesheje izindi mpunzi. Bamufashe, twabonye ko yari yamaze kohereza amafoto menshi. Abo bantu uko ari babiri batawe muri yombi na polisi. Bafungiye muri kasho iri mu nkambi.”
Impunzi z’Abarundi ziranavuga ko aba bantu bacengezwa mu nkambi n’intumwa z’u Burundi zifite umugambi wo guteza umutekano mukeya mu nkambi.
Bati: “Baraza bakibaruza nk’impunzi mu gihe mu by’ukuri bari mu butumwa. Izi mbonerakure ni intumwa za guverinoma y’u Burundi nubwo zimaze igihe muri iyi nkambi.”
Hagati aho haravugwa ko hashyizweho itsinda rigizwe n’impunzi z’Abarundi rigiye gukurikiranira hafi iyi dosiye.
