BK Group Plc yatangaje ko mu mwaka ushize yungutse miliyoni 30.7 z’amadolari, ni ukuvuga agera kuri miliyari 27.4 Frw mu mwaka wa 2018, bingana n’inyongera ya 17.2% ugereranyije n’umwaka wabanje.
Kuri uyu wa 28 Werurwe 2019 nibwo BK Group PLC yashyize ahabona inyungu yabonye mu mwaka ushize kugeza ku wa 31 Ukuboza 2018.
Umuyobozi wa BK Group Plc, Dr Karusisi Diane, yavuze ko mu mwaka ushize ubukungu bw’igihugu bwazamutse ku kigero gishimishije cya 8.6%, bigatuma n’ubw’iki kigo gikomeza gutera imbere nta nkomyi.
Ati “Ibikorwa byacu byaba mu bwishingizi, ikoranabuhanga n’ibindi byateye imbere. Turashimira abakiliya n’abashoramari batugannye, turabateganyiriza izindi serivisi nziza muri uyu mwaka.”
BK Group Plc ibumbiye hamwe ibigo birimo Banki ya Kigali, BK TecHouse, BK General Insurance na BK Capital.
Umutungo mbumbe w’iki kigo nawo mu mwaka ushize wazamutseho 20.7% ugera kuri miliyari 877 Frw.
Src: IGIHE
