Inzira ndende n’uruhererekane, RNC na FLN bakoresha bagamije guhungabanya umutekano w’u Rwanda

Hamaze iminsi havugwa,  amakuru  y’uruhererekane n’uburyo abanzi b’u Rwanda bakoresha bagamije guhungabanya umutekano warwo. Umunsi ku wundi niko  RNC ya Kayumba Nyamwasa na FLN ya ba Sankara na Rusesabagina bahindura umugambi  bagamije kuyobya uburari  bakoresheje ibihugu by’ibituranyi u Burundi , Repubulika iharanira demokarasi ya Congo na Uganda.

Uganda ntikihishira kuko amakuru yizewe aturuka ku bazi iby’uyu mugambi, bavuga ko mu mezi make ashize abantu bo muri RNC baherekejwe n’abo mu Rwego rw’Ubutasi bwa Gisirikare muri Uganda [ CMI ] bajyiye  mu nkambi ya Nakivale, bakangurira urubyiruko ku mugaragaro kujya muri uwo mutwe.

Amakuru  avuga ko abarwanyi bashya b’umutwe wa RNC ya Kayumba Nyamwasa batoranywa mu nkambi za Nakivale na Bweyale Kiryadongo bakajyanwa guhabwa inyigisho z’ibanze mu kigo cya gisilikare cya Kaweweta, giherereye muri Luwero –Nakaseke District.Iyo bavuye muri iyi myitozo [Training] bajya Nord –Kivu bahawe n’ibikoresho bya gisilikare.

Mu kubagezaho ibikoresho, amakuru yizewe  avuga ko aba barwanyi bakoresha inzira y’ubwato mu kiyaga cya Tanganyika ,  ibiribwa  bimwe biva Zambia bimanukira muri Lac Tanganyika  bikururukira aho bita Mboko, aho niho ubwato bwambukira,  bikakirwa n’abo barwanyi  bikajya muri Minembwe aho bita Bijabo  ni mu kibira  kigizwe n’imigano n’udusozi duto duto. Iyi nzira ninayo abayobozi babo bakoresha bajya gusura iyi nkambi.

Aka  gace ka Bijabo,  gaherereye mu misozi miremire ya Minembwe muri Sud-Kivu kabaye indiri y’ingabo za RNC ya Kayumba Nyamwasa , mu mezi make ashize. Bijabo iherereye muri Fizi naho Bijombo ikaba muri Uvila bikagabanywa n’uruzi rwa Rwerera.  Fizi iri muri  Collectivite ya Mutambora naho Bijombo iherereye  mu cyaro cya Uvila mu misozi yo hejuru.

Izi ngabo za RNC ziri muri Bijabo,  ziyobowe n’uwitwa  Karemera Andrew, bivugwa ko yahunze igihugu kubera ibyaha bitandukanye  yakoreye mu ngabo zahoze ari iza RPA.  Bamwe mu baturage baho  baherutse kuganira na Rushyashya bagira bati : “Abo  bitwaje ibirwanisho biyita  ingabo za Kayumba  bamwe bamaze iminsi bagaragara mu isoko  rizwi nko kwa Ntayoberwa, baje  guhaha iposho  barangiza  bagasubira mu kibira  mu rugano.  Ariko abo tubona  ni bake cyane ntibarenga ijana “.

Amakuru duhabwa n’umwe mu banyamulenge utarashatse ko dutangaza amazina ye kubera umutekano we yabwiye Rushyashya ko izi ngabo za Kayumba zifitanye ubucuti budasanzwe na bamwe mu banyamulenge barimo Nyamusaraba na Semahurungure,  ari nabo  babarangiye aho bakambika muri  Bijabo,  aho ni ahahoze ibirindiro by’ingabo zo gukuraho ubutegetsi bwa Mzee Laurant Desire Kabila, ati :“  Ubwo bavaga muri Uganda  baje badafite iyo bajya bageze  hano muri  Nord- Kivu, Nyamusaraba na Semahurungure biyita aba kada babo [ cadre ] babajyana Bijabo kuko ntihatuwe ni murugano  kandi hahoze izindi ngabo z’u Rwanda zakuyeho Mzee Kabila”.

Ati : abategetsi  babo [ RNC]  bakunze gukora ingendo  basura  iyi nkambi baciye muri  Lac Tanganyika , bakoresheje ubwato banyura  ku cyambu [ Port]  cya Purungu  bava  Zambia, akenshi niyo bava  baturutse muri  Afrika y’epfo, bamanuka Lac Tanganyika bakururukira aho bita Mboko, aho ubwato bwambukira, bakajya mu misozi  ya Minembwe muri Bijabo  ni mu kibira  ntihatuwe, haba inka gusa.

Ngiyo inzira n’uruhererekane abanzi b’u Rwanda  bakoresha  bagamije guhungabanya umutekano  warwo  kuko ngo  iyo bavuye muri  Nord –Kivu baca i Burundi mu kibira cya Cibitoki, ihana imbibe n’intara y’uburengerazuba bw’u Rwanda.

Andi makuru  aturuka muri Uganda mu nkambi z’impunzi,  agaragaza iby’uyu mugambi muremure w’abanzi b’u Rwanda,   avuga ko abatajyanywe mu myitozo ya RNC muri Kivu y’amajyepfo [ RDC], bafatwa bagakurwa mu nkambi hanyuma hagatangira gukwizwa amakuru ko bashimuswe na Leta y’u Rwanda, bityo  CMI ikagaragaza  ko Uganda  ari igihugu cyinjiriwe  n’u Rwanda,  rukavogera ubusugire bwayo.