Al Ahly SC yo mu Misiri yegukanye Shampiyona Nyafurika yʼAmakipe yʼAbagabo muri Volleyball [CAVB Men’s Club Championship 2026], itsinze Police VC amaseti 3-0 (20-25, 21-25, 25-22).
Umukino wa nyuma usoza iri rushanwa ryakinwaga ku nshuro ya 47, wabereye muri BK Arena, kuri uyu wa Gatandatu, tariki ya 2 Gicurasi 2026.
Al Ahly SC yanditse amateka yo kwegukana igikombe cyayo cya 17 mu gihe Police VC na yo yageze ku mukino wa nyuma bwa mbere mu mateka yayo, ndetse yabaye iya mbere ibikoze mu Rwanda.
Mu mukino wahuje amakipe yombi, Al Ahly SC yatsinze Police VC amaseti 3-0 mu mukino wamaze isaha n’iminota 21.
Muri rusange, Al Ahly SC yatsinze Police VC amanota 75-63 mu maseti atatu. Elphas Maikuva Makuto wa Police VC ni we watsinze amanota menshi [17] muri uyu mukino mu gihe Jose Israel Masso Alvarez w’iyi kipe yo mu Misiri yatsinze 13.
Mu irushanwa ryose, Makuto yatsinze amanota 141 mu gihe Masso Alvarez yinjije 78.
Muri iri rushanwa rimaze iminsi 10 rikinirwa mu Rwanda, Police VC ni yo yashoboye gutsinda Al Ahly nibura amanota arenze 20 muri seti imwe. Iyi kipe ya mbere muri Afurika, ugendeye ku mubare w’ibikombe, yasoje irushanwa nta seti cyangwa umukino yatsinzwe.
Muri CAVB Men’s Club Championship 2026, u Rwanda rwanditse amateka yo kwakira bwa mbere ariko n’amakipe abiri muri ane yari aruhagarariye yasoreje mu myanya itatu ya mbere.
REG VC yegukanye umwanya wa gatatu itsinze Petrojet Sporting Club yo mu Misiri amaseti 3-1 (25-21, 25-21, 13-25, 25-17).
Andi makipe yari ahagarariye u Rwanda ni APR VC yabaye iya 11 mu gihe Kepler VC yasoreje ku mwanya wa karindwi mu makipe 24 yitabiriye irushanwa.
Abakinnyi umunani beza mu irushanwa batoranyijwe barimo bane bakinira amakipe yo mu Rwanda na batatu bo mu Misiri.
Muri bo harimo Matui Nicholas ukinira REG VC wagizwe ‘outside hitter’ n’abandi ba Police VC bayobowe na Frank Shyaka ‘Middle blocker’, Melly Brian Kiprui ‘Setter’ na Irakoze Alain ‘Libero’.
Mu bandi bakinnyi beza bahembwe ni Abdelrahman Elhossiny Eissa wabaye ‘outside hitter’, Abou Abd Elhalim Mohamed ‘Middle blocker’ na Masso Alvarez Jose Israel ‘Opposite’ ba Al Ahly SC.
Umukinnyi w’irushanwa watowe ni Abdelrahman Elhossiny Eissa ukinira Al Ahly SC. Abdelrahmanw’imyaka 24, ureshya na metero 1,9 yatsinze amanota 60 mu irushanwa.
Uko amakipe yakurikiranye muri CAVB Men’s Club Championship 2026:
1. Al Ahly VC (Egypt)
2. Police VC (Rwanda)
3. Rwanda Energy Group (Rwanda)
4. Petrojet SC (Egypt)
5. Port Autonome de Douala (Cameroon)
6. Kenya Ports Authority (Kenya)
7. Kepler VC (Rwanda)
8. Fath Union Sport (Morocco)
9. Ghana Army (Ghana)
10. Nemo Stars (Uganda)
11. APR VC (Rwanda)
12. Nigeria Customs (Nigeria)
13. Equity Bank (Kenya)
14. General Service Unit (Kenya)
15. Kalibi SC (Ghana)
16. Sport-S VC (Uganda)
17. Litto Team VC (Cameroon)
18. Cameroon Volleyball (Cameroon)
19. AS INJS (Côte d’Ivoire)
20. Rukinzo VC (Burundi)
21. Wolaitta Dicha Sports Club (Ethiopia)
22. Black Rhinos VC (Zimbabwe)
23. Atlético Clube do Mindelo (Cape Verde)
24. Prisons VC (Tanzania)
