Mu ijambo perezida Kabila yavuze asezera ku butegetsi ku munsi w’ejo Taliki ya 23 Mutarama 2019,yasabye imitwe ya politiki yose yiyamamaje mu matora ya perezida wa RDC kuwa 30 Ukuboza 2019 ko bashyira hamwe na Tshisekedi mu kubaka igihugu.
Mu ijambo rye rya nyuma nka perezida wa Repubulika ryamaze iminota 14 n’amasegonda 30,Kabila yavuze ko yifuza ko Kongo yakunga ubumwe ndetse asaba amashyaka atavuga rumwe na Leta gukora icyatumye igihugu gitera imbere.
Kabila yashimye cyane abakongomani uko bitwaye mu matora yo kuwa 30 Ukuboza 2018 ndetse yemeza ko aribwo bwa mbere amatora yakozwe neza mu bwisanzure ndetse abaturage aribo bishatsemo ubushobozi bw’ibikoresho byakoreshejwe muri aya matora.
Kabila yavuze ko aya matora agaragaza ko Abakongomani bamaze gutera imbere muri demokarasi kuko agiye guha ubutegetsi Felix Tshisekedi mu mahoro.
Kabila yasabye abakongomani kugira intumbero imwe,bakareka ibitandukanya ahubwo bagafatanya kugira ngo RDC ikomeze itere imbere aho yavuze ko bakwiriye guhuza imbaraga kugira ngo bategurire ejo hazaza heza abana babo.
Kabila yavuze ko agiye guha ubutegetsi Tshisekedi yishimye ndetse ntacyo yicuza ndetse abona ari umugabo wihagije atazakenera ubufasha bwe.
Perezida Kabila wari umaze imyaka 18 ku butegetsi kuva muri 2001, arahererekanya ububasha na Felix Tshisekedi watorewe kuyobora Kongo,kuri uyu wa Kane taliki ya 24 Mutarama 2019.
