Umushinjacyaha mukuru muri Kenya yategetse ko haba iperereza muri komisiyo y’amatora ku byaha bishobora kuba byarakozwe mu matora y’ukwezi kwa Munani yagizwe impfabusa.
Keriako Tobiko yasabye polisi n’urwego rushinzwe kurwanya ruswa gutanga ibisubizo mu minsi 21.
Yanasabye gusuzuma ibirego bivuga ko babiri mu bakandida bakomeye batavuga rumwe n’ubutegetsi bashobonye kugera kuri mudasobwa za komisiyo y’amatora ku buryo butemewe n’amategeko.
Urukiko rw’Ikirenga rwavuze ko amatora y’umukuru w’igihugu yagaragayemo ibintu bitubahirije amategeko ariko ntirwigeze rutunga agatoki abantu ku giti cyabo. Andi matora ateganyijwe kuba ku itariki ya 26 Ukwakira.
Ubushyamirane buri hejuru mu gihugu gifite amateka y’urugomo rukorwa nyuma y’amatora.
Umuyobozi wa Komisiyo y’ amatora Wafula Chebukati [ hagati ] hamwe n’umuyobozi mukuru Ezra Chiloba [ ibumoso ] hamwe n’abakomiseri baganira n’abanyamakuru
Abagize akanama k’amatora bari batangaje mu kwezi gushize ko perezida Uhuru Kenyatta yagize amajwi 54% naho uwo bari bahanganye Raila Odinga akabona 44%.
Ariko Odinga yiyambaje ubucamanza avuga ko yahugujwe intsinzi.
Ku itariki ya 01 Nzeri Urukiko rw’ikirenga rwatangaje ko amatora “atarimo umucyo kandi atashoboraga kugenzurwa” rufata umwanzuro utarigeze ufatwa mbere, ruyatesha agaciro.
Perezida wa Kenya Uhuru Kenyatta avuga ko intsinzi ye yari ifite ishingiro.
