Koffi Olomide, umuhanzi w’icyamamare ukomoka muri Repubulika Iharanira Demokarasi ya Kongo, yashimangiye ko atazibagirwa akababaro yatewe n’umufana we w’umunyarwanda Me Toy Nzaramba wapfuye nyuma y’amasaha macye bari kumwe, akaba yariciwe hafi y’aho bari bari kumwe muri Kigali Convention Center.
Me Nzamwita Toy yari muri Kigali Convention Center ku mugoroba wo kuwa Kane tariki 29 Ukuboza 2016, ndetse hakwirakwijwe cyane amafoto ye ari kumwe n’umuhanzi Koffi Olomide wari uhafite igitaramo kuwa Gatandatu tariki 31 Ukuboza 2016.
Polisi y’u Rwanda kuwa Gatanu yatangaje ko Nzamwita Ntabwoba Toy yari atwaye imodoka ya Toyota Land Cruiser, hanyuma ahagana saa cyenda z’urukerera rwo kuwa Gatanu agasuzugura icyapa abapolisi basuzumiraho imodoka ku ruhande rw’ahazwi nka KBC, agakomeza ashaka kugonga umupolisi wari umuhagaritse, hanyuma umupolisi akarasa imodoka agamije kumuhagarika ariko agahamya umutwe we agahita amwica.
Amwe mu mafoto ya nyuma ya Me Nzamwita Toy, yifotozanyije n’icyamamare Koffi Olomide
Ubwo yari agiye kuririmba muri Kigali Convention Center, umuhanzi Koffi Olimide yasabye abafana be ko bafata umunota wo kwibuka umufana we Me Toy Nzaramba, avuga ko byamubabaje cyane kubona apfa nyuma gato bari kumwe. Gusa Koffi Olimide we icyo gihe yavuze ko yazize impanuka yo mu muhanda, n’ubwo ntawahamya niba ataramenye neza uburyo yapfuyemo cyangwa akaba ari ko yashatse kubyita ku bushake.
Koffi Olimide n’itsinda ry’abakobwa baririmbana bafashe umunota umwe wo kwibuka Me Toy
