Ku gicamunsi cyo kuri uyu wa mbere tariki ya 6 Nzeri 2021, nibwo ikipe y’abanyamujyi ya AS Kigali yerekanye umukinnyi wo hagati Niyonzima Olivier uzwi nka Sefu amasezerano y’imyaka 2 akinira iyi kipe yitegura gukina imikino Nyafurika ihuza amakipe yatwaye ibikombe iwayo CAF Confederations Cup.
Iyi kipe yerekanye Sefu wahoze yifuzwa n’amakipe atandukanye ya hano mu Rwanda arimo ikipe ya Rayon Sports ndetse na Police FC, ibi bibay nyuma yaho aheruka gutandukana n’ikipe y’ingabo z’igihugu ya APR FC bitewe n’imyitwarire itari myiza nkuko byatangajwe n’iyi ikipe yari amazemo imyaka ibiri
Uyu mukinnyi yasinye amasezerano y’imyaka ibiri akinira iyi kipe ya AS Kigali, aho bivugwa ko uyu mukinnyi ngo yaba yahawe miliyoni 20 z’amafaranga y’u Rwanda ndetse n’umushara wa Miliyoni imwe nk’umushahara wa Miliyoni imwe ku kwezi.
Uyu mukinnyi yerekanywe mu gihe AS Kigali yiteguraga kwerekeza mu birwa bya Comoros aho igiye guhatana n’ikipe ya Olympique mu mikino Nyafurika ya CAF Confederations Cup, ni ikipe yahagurutse ahagana ku isaha ya saa saba n’igice zo mu gitondo zo kuri uyu wa kabiri, biteganyijwe ko iyi kipe igerayo kuri uyu wa Kabiri ku isaha ya saa saba z’amanywa.
Ni umukino uteganyijwe kuri uyu wa gatanu, tariki ya 10 Nzeri 2021 mu mukino ubanza mu gihe umukino wo kwishyura uzaba nyuma y’icyumweru kimwe ubere kuri sitade ya Kigali i Nyamirambo ku itariki ya 18 Nzeri 2021.
Ikipe izakomeza hagati ya AS Kigali ndetse na Olympique biteganyijwe ko izahura na Darling Club Motema Pembe yo muri Repubulika iharanira Demokarasi ya Congo.
