Kuri uyu wa mbere tariki ya 9 Mutarama 2022, nibwo hamenyekanye amakuru y’itabwa muri yombi ya Nyampinga w’u Rwanda wa 2017, Iradukunda Elsa nyuma yaho akurikiranweho ibyaha birimo gukoresha impapuro mpimbano no kubangamira iperereza.
Nk’uko ikinyamakuru IGIHE cyabyanditse, Miss Iradukunda Elsa yatawe muri yombi ku Cyumweru tariki 8 Gicurasi 2022 akurikiranyweho ibyaha byo kubangamira iperereza ku birego bishinjwa Ishimwe Dieudonné, uyu Nyampinga kuri ubu akaba afungiye kuri Station ya RIB i Remera.
Iki kinyamakuru kandi gikomeza kivuga ko Umuvugizi wa RIB, Murangira B.Thierry, yemeje amakuru y’ifatwa rya Elsa Iradukunda, ati“akurikiranweho ibyaha birimo gukoresha inyandiko mpimbano no kubangamira iperereza.”
Bivugwa ko RIB yatangiye gukora iperereza ku byaha bifitanye isano na ruswa y’igitsina muri Miss Rwanda mu 2019. Kuva icyo gihe, hatangiye gukusanywa ibimenyetso kugeza ubwo Ishimwe atawe muri yombi.
IGIHE ikomeza ivuga ko ifite amakuru y’uko kuva Ishimwe Dieudonné uzwi nka Prince Kid yafungwa, Miss Elsa yatangiye kujya kureba abakobwa bose batanze ubuhamya ku ihohoterwa bagiye bakorerwa kugira ngo bazivuguruze imbere y’urukiko.
Usibye itabwa muri yombi rya Elsa Iradukunda, Ministeri y’Urubyiruko ndetse n’Umuco yamaze guhagarika irushanwa rya Nyampinga w’u Rwanda ndetse n’ikigo gitegura iri rushanwa cya Rwanda Inspiration Back Up gikuriwe na Prince Kid uheruka gutabwa muri yombi.
Ibinyujije kuri Twitter, iyi Minisiteri yagize iti “Hashingiwe ku iperereza ririmo gukorwa n’Urwego rw’Igihugu rushinzwe ubugenzacyaha (RIB), ku muyobozi wa “Rwanda Inspiration BackUp”, ukekwaho ibyaha bifitanye isano n’ihohoterwa rishingiye ku gitsina yakoreye abakobwa bitabiriye irushanwa rya “Miss Rwanda” mu bihe bitandukanye.”
Minisiteri y’Urubyiruko n’Umuco iramenyesha Abanyarwanda ko ibaye ihagaritse iri rushanwa mu gihe iperereza ritararangira.
Ibi byose bibaye nyuma yaho Ishimwe Dieudonné uyobora Rwanda Inspiration Backup itegura Miss Rwanda yatawe muri yombi ku wa 25 Mata 2022 akurikiranyweho ibyaha bifitanye isano n’ihohoterwa rishingiye ku gitsina yakoreye abakobwa bitabiriye iri rushanwa mu bihe bitandukanye.
