Perezida Donald Trump w’ Amerika yavuze ko igihugu cye cyohereje abasirikare mu gihugu cya Gabon, bo kwinjira gutabara muri Repubulika iharanira demokarasi ya Congo (RD Congo) igihe ibintu byasubira irudubi kubera amatora y’umukuru w’igihugu.
Mu ibaruwa yoherereje abakuru b’Inteko ishingamategeko na Sena , Perezida wa Amerika yavuze ko umubare w’ abasilikare wa mbere 80 wageze muri Gabon ku munsi wa Gatatu w’iki cyumweru dushoje.
Ku bwa Donald Trump, izo ngabo zijyanywe muri icyo gihugu kugira ngo zikingire abanyamerika hamwe n’abadiplomate b’ Amerika i Kinshasa, umurwa mukuru wa RD -Congo.
Yagize ati: “Abo basirikare bazaguma muri ako karere kugeza igihe umutekano wo muri RD -Congo uzaba umeze neza bitagikenewe ko bagumayo.”
Ku bwa Perezida Trump, hashobora kuherezwa izindi ngabo ziyongera ku zimaze kugerayo, igihe byaba bikenewe.
Komisiyo y’ amatora muri RD -Congo, igomba gusohora ibyavuye mu matora kuri iki cyumweru tariki ya 6 Mutaramba 2019.
Mu gihugu hakomeje gutoragurwa impupuro z’itora mu migezi no muri za ruhurura n’ahandi hagenewe imyanda, bigaragara ko habayeho uburiganya muri ayo matora y’umukuru w’igihugu. Ibyayavuyemo bikaba bishobora gukurura imvururu mu batavuga rumwe n’umukandida Emmanuel Ramazani Shadary w’imyaka 57 y’amavuko, ushyigikiwe na Perezida Kabila.
Emmanuel Ramazani Shadary
