Perezida Yoweri Museveni wa Uganda kuri iki Cyumweru yasuye abasirikare ba Monusco bakomoka muri Tanzania bari kuvurirwa mu Bitaro bya Nakasero muri Kampala nyuma yo gukomerekera mu gitero umutwe wa ADF wagabye ku birindiro byabo kigahitana bagenzi babo 15 abandi benshi bagakomereka.
Aba basirikare ba Tanzania bakomerekeye mu gitero bagabweho kuwa 08 Ukuboza 2017, n’inyeshyamba Umuryango w’Abibumbye wahise wemeza ko cyagabwe n’inyeshyamba zirwanya ubutegetsi bwa Uganda zikorera mu burasirazuba bwa Congo.
Perezida Museveni nk’uko tubikesha Chimpreports, yakiriwe ku Bitaro bya nakasero n’Umunyamabanga wa Mbere muri Ambasade ya Tanzania, Brig. Gene. Skilder Makona, akaba yagaragaje ko yifatanyije n’aba basirikare bane bari kuvurirwa muri ibi bitaro mbere yo kongera kwamagana iki gikorwa yise icya bunyamaswa cyakozwe n’inyeshyamba.
Abaganga bari gukurikirana aba basirikare bijeje perezida Museveni ko batakiri mu kaga ko kuba babura ubuzima ahubwo bari bukire vuba.
Brig. Gen. Makona akaba yashimiye perezida Museveni ku bufasha yahaye aba basirikare no kuba yagiye kubasura mu bitaro.
Nyuma y’iki gitero cyaguyemo abasirikare ba Monusco abandi bakahakomerekera, perezida Museveni yahise ategeka kugaba ibitero ku nkambi za ADF muri Beni, ho muri Repubulika iharanira Demokarasi ya Congo.
Ibi bitero bikaba byaratangijwe ku mugaragaro kuri uyu wa gatanu ushize hakoreshejwe imbunda ziremereye zirasa kure ndetse n’ibitero by’indege.
