Kuri uyu wa Kane tariki 27 Gashyantare 2020, Perezida wa Repubulika Paul Kagame na Madamu Jeannette Kagame, bitabiriye umuhango wo gutaha ku mugaragaro Hoteli y’inyenyeri eshanu yitwa One & Only Gorilla’s Nest iherereye mu Kinigi mu Karere ka Musanze.
Ifite ibyumba 21 biri mu byiciro bine. Icyiciro cya mbere gifite ibyumba 10, igikurikiraho gifite ibyumba bine, ikindi bitanu naho icya nyuma kikagira ibyumba bibiri. Uko bikurikirana, ni nako bitandukanye mu biciro, mu bunini no mu bwiza.
Zitatse mu buryo bwa Kinyarwanda hakoreshejwe imigongo, hakabamo n’ibindi bikoresho by’ubugeni.
Ibyumba icumi biri mu cyiciro cya mbere, byishyurwa ibihumbi bitatu na magana atandatu (3600) by’amadolari ku ijoro rimwe (ni ukuvuga abarirwa muri miliyoni eshanu n’igice mu mafaranga y’u Rwanda) naho icyumba cya menshi ni ibihumbi icumi na magana atanu (10500) by’amadolari (hafi miliyoni icumi z’amafaranga y’u Rwanda)gishobora kwakira nk’abakuru b’ibihugu.
Mu mafaranga umuntu yishyura, haba harimo ibyo kurya n’ibyo kunywa. Ibintu byose byubatse ibyumba by’iyi hoteli bikozwe mu mbaho nubwo bifashwe n’ibyuma.
Iyi hoteli yubatse ku buso bungana na hegitari 35. Aho yubatse hahoze hari hoteli yitwa Gorilla’s Nest. Imirimo yo kuyubaka yamaze imyaka igera kuri ibiri, yuzura itwaye miliyoni 65 z’amadolari ya Amerika. Imaze gutanga akazi ku bantu 120 bahoraho barimo Abanyarwanda 100.
Mu Kwakira 2019 nibwo iyi hoteli yatangiye gukora ariko ntabwo yari yagafunguwe ku mugaragaro.
Kuva mu kwa gatanu kugera mu kwa cyenda, nibwo iba ifite abashyitsi benshi. Imboga zose zitekerwa abashyitsi muri iyi hoteli, zihinze mu bice byayo. Amoko y’ibyatsi ibihumbi 36 ni yo yatewe mu ishyamba ririmo iyi hoteli.
Src: KT
