Ikipe ya Kirehe Volley Ball Club yamaze kumvikana n’umutoza Peter Kamasa kuyibera umutoza mukuru, ni mugihe uyu mutoza aje muriyo kipe aje gusimbura Bagirishya Jean De Dieu uzwi nka Jado Castar wagiye mu buyobozi bw’ishyirahamwe ry’umukino w’intoki wa Volley Ball mu Rwanda.
Ibiganiro hagati y’ikipe ya Kirehe VC ndetse na Peter Kamasa byashyizweho akadomo kuri uyu wa gatanu tariki ya 11 Kamena 2021, hakaba habayeho kumvikana ko uyu mutoza agiye kuyobora Kirehe VC mu gihe cy’imyaka ibiri iri imbere ndetse akaba Kamasa yahise atangiza imyitozo muri iyi kipe ibarizwa mu karere ka Kirehe mu ntara y’i Burasirazuba.
Umutoza Peter Kamasa agizwe umutoza mukuru w’iyi kipe nyuma yaho yagiye anyura mu makipe atandukanye harimo ayo yabereye umutoza wungirije mu ikipe y’abagabo ya REG VC hagati y’umwaka 2017 na 2019, yanabaye n’umutoza mukuru wa RRA hagati ya 2016 na 2017 anatwarana nayo igikombe cya shampiyona y’uwo mwaka.
Peter Kamasa aje muri Kirehe VC nyuma y’aho iyi kipe yagiye igira ibibazo by’amikoro ya hato na hato dore ko iyi kipe yanagize n’ibihe byiza mu myaka ya 2016 ubwo yatozwaga na Nyirimana Fidele kuri ubu uri kubarizwa mu ikipe ya UTB.
Kamasa Peter agizwe umutoza mukuru wa Kirehe asimbuye Bagirishya Castar wari umaze umwaka umwe atoza iyi kipe mbere y’uko yari umutoza wungirije mu ikipe ya Gisagara VC, kugeza ubu Castar yatorewe kuba visi perezida wa kabiri muri komite iherutse gutorwa y’ishyirahamwe ry’umukino wa Volleyball mu Rwanda.
