Dr Rudasingwa Theogene wahoze ari umuhuzabikorwa w’ishyaka RNC, nyuma akaza kwitandukanya naryo, avuga ko yahizwe ndetse aba ruvumwa mu bo bakoranaga muri iri shyaka kubera Kayumba Nyamwasa.
Ihuriro RNC (Rwanda National Congress) rigizwe n’abarwanya Leta y’u Rwanda, bamwe bakaba baranahoze bayikorera. Rudasingwa Theogene waje kwitandukanya nabo agashinga ishyaka rye yise RNC Nshya (New RNC), yashimangiye ko yahigwaga n’abo yise abasirikare ba Kayumba Nyamwasa. nkuko bwiza.com yabyanditse.
Mu kiganiro yagiranye n’ikinyamakuru gikorera i Burayi ndetse n’amashusho agashyirwa kuri youtube, Rudasingwa yasobanuye ko abamuhigaga yita abasirikare ba Kayumba barimo Ben Rutabana, Higiro Robert, Micombero,…
Yagize ati “ Narabavuze no mu kiganiro cy’ubushize[abamuhigaga], abo ba Micombero, ba Nkubana, ba Rutabana, Higiro Robert,… abo bantu bose nibo birirwaga hanze ahongaho, hari n’abo birirwaga babibwira, mbese nari narabaye nka ruvumwa kandi uwanshumurije abo bantu ari Kayumba Nyamwasa yicaye aho ngaho”.
Yakomeje avuga ko yatandukanye na RNC, kandi batandukana nabi, akavuga ko RNC ntacyo isigaranye, ko Kayumba nta mbaraga afite kimwe n’abo bafatanyije nyuma yaho mu ishyaka havukiyemo ikibazo giturutse mu bari barigize.
Ati “Wagirango nari umuhanuzi kuko icyo gutandukana narakivuze kandi dutandukana nabi,… kugeza ubu wakwibaza igisigaye muri RNC ni iki? Muri RNC barahombye ariko bo ntabwo bafite courage, nta courage Kayumba afite na bariya bafatanyije ba Condo, ngo babwire abantu babasigaye inyuma, ngo bababwire bati ibi bintu ntaho bijya, bati ibi bintu byararangiye,…”.
Ishyaka RNC ryashinzwe mu 2010, na bamwe mu bahoze mu gisirikare cy’u Rwanda nka Col Patrick Karegeya, Maj.Dr Rudasingwa Théogene, Gen Kayumba Nyamwasa,… nyuma y’urupfu rwa Karegeya rwamenyekanye mu gitondo cyo ku wa 1 Mutarama 2014, nibwo muri iri shyaka hatangiye kuvuka umwiryane.
Mu itangazo ryashyizwe ahagaragara na Dr Rudasingwa, Gahima Gerald, Joseph Ngarambe na Musonera Jonathan mu kwezi kwa karindwi (2016), batangaje ku mugaragaro ko bitandukanije na Kayumba bashinga umutwe wabo New RNC.
Rudasingwa yigaragajemo nk’umuyobozi w’iryo huriro rishya , aho yungirijwe na Joseph Ngarambe wari usanzwe ari umugenzuzi mukuru wa RNC.
Muri uko kwezi, Dr Rudasingwa n’uwitwa Gervais Condo [wasigaye ku ruhande rwa Kayumba] batumiwe kuri BBC baterana amagambo, ashinja Rudasingwa gushaka kugundira ubutegetsi mu ishyaka yanga kwemera ko hakorwa amatora ndetse ko ariyo ntandaro yo gushwana n’abasigayemo.
Ibi Rudasingwa na we ntayabikozwa, akavuga ko kujya muri RNC bisa no kuba yarataye umurongo kuko yahuye na Kayumba Nyamwasa wubatse akazu muri iryo shyaka kagizwe n’abahoze mu ngabo z’u Rwanda bahungiye mu mahanga.
Yagize ati “Yubatse akazu akoresheje abantu bahoze ari abasirikare akenshi bahoze bamukorera akiri mu Rwanda”.
Mu kiganiro yagiranye na BBC, Kayumba Nyamwasa yahakanye ibyo Rudasingwa yamushinjaga ndetse anatangaza ko RNC yakomeje kubaho, hatorwa abayobozi bashya nyuma yaho bamwe bitandukanije nayo.
