Perezida wa Leta Zunze Ubumwe z’Amerika Donald Trump yashinjwe n’umudepite w’umudemokarate gushinyagurira umugore w’umusirikare wa Leta Zunzwe Ubumwe z’Amerika waguye muri Niger.
Depite Wilson Frederica wo muri Leta ya Frolida yumvikanye mu bitangazamakuru bitandukanye byo muri Amerika ashinja Perezida Trump gushinyagurira no gukina ku mubyimba umugore wa nyakwigendera La Davida Johnson umusirikare wa Leta Zunzwe ubumwe za Amerika.
Wilson yatangaje ko ubwo Trump yavuganaga n’umugore wa Johnson yakoresheje imvugo isa no gukina ku mubyimba, ubwo yabwiraga uwo mugore ko nyakwigendera yari azi ibyo yagiyemo amagambo afatwa nko gutererana umuntu uri mu kababaro aho kumuhumuriza.
Trump utajya arya indimi abinyujije kuri Twitter yasubije uyu mudepite ko ibyo avuga ari ukubeshya kuko atigeze akoresha ayo magambo. Nyamara Wilson we agashimangira ko ibyo avuga ari ukuri kuko yakurikiranye ibiganiro Donald Trump yagiranye n’uyu mugore ubwo bari mu nzira bagana ku kibuga mpuzamahanga cya Miami kwakira umurambo wa nyakwigendera.
Johnson ni umwe mu basirikare 4 baguye muri Niger mu ntangiriro z’uku kwezi kwa k’Ukwakira 2017.
