Abakinnyi 6 basanzwe bakinira ikipe y’ingabo z’igihugu ya APR FC bashobora gutandukana nayo bitewe n’ibibazo bitandukanye birimo umusaruro utari mwiza w’abaranze by’umwihariko muri uyu mwaka w’imikino wa 2021-2022 abandi bagatizwa.
Nk’uko byavuzwe n’abanyamakuru bakora ikiganiro One sport Show gitambuka kuri Radio One buri munsi guhera ku isaha ya saa sita kugeza ku isaha ya saa Munani, ngo abakinnyi 6 bazatandukana n’iyi kipe nyuma ngo y’inama yabaye muri iki cyumweru.
Nk’uko byatangarijwe muri icyo kiganiro cy’imikino, ngo umutoza mukuru w’iyi kipe ya APR FC Adil Erradi Muhammed yatanze raporo avuga ko hari urutonde rw’abakinnyi batandatu bazatandukana n’iyi kipe abandi babiri yo bakazatizwa mu ikipe ya Marines FC.
Abanyezamu babiri bahoze mu ikipe y’Intare FC ngo bashobora kwerekeza mu ikipe ya Marines FC ibarizwa mu karere ka Rubavu ni Kenese Armel na Alexandre Mutabaruka.
Abakinnyi batazakomezanya n’iyi kipe ya APR FC bari basanzwe bayikinira ni Ngabonziza Guille, Karera Hassan , Itangishaka Blaise , Nizeyimana Djuma na Tuyisenge Jacques ndetse na Mugunga Yves .
Gutandukana kwa APR FC na Karera Hassan biturutse ku kuba uyu mukinnyi yarekeje hanze y’u Rwanda aho yasanze umugore we, gusa kugenda kwe akaba yari yasabye uruhushya bivuga ko yagombaga kugaruka ariko ubu akaba akiriyo ndetse nta n’icyizere cyo kuzagaruka gihari.
Kugeza ubu muri shampiyona y’u Rwanda ya 2021-2022, ikipe ya APR FC imaze gukina imikino 20 ikaba iri ku mwanya wa mbere n’amanota 44 ikaba inganya aya manota n’ikipe ya Kiyovu SC.
