Igipolisi cya Uganda ahitwa Kanungu kiri guhiga bukware abantu bitwaje intwaro barashe bagakomeretsa abantu batatu mbere yo kubiba amafaranga hataramenyekana umubare ndetse bagashimuta undi muntu bashaka ingurane.
Igipolisi kiravuga ko abo bantu bitwaje intwaro bari bane bambaye imyambaro isa nk’impuzankano y’igisirikare cya Congo.
Ibi bikaba byarabaye mu gitondo cyo kuwa Gatanu, aho bivugwa ko aba bagabye igitero ku imodoka yo mu bwoko bwa Isuzu Canter ifite ibirango, UAB 196 J, yari ipakiye isamake ivuye Kasese igana ahitwa Isasha.
Iki gitero cyabereye mu masaha ya saa munani muri Pariki y’Igihugu yitiriwe Umwamikazi Elisabeth hafi y’ikigo cya gisirikare cya Southern Gate.
Nk’uko byatangajwe n’umuvugizi w’igipolisi mu karere, Elly Maate, ngo abateye barashe ku modoka, bakomeretsa abari bayirimo barimo umushoferi, Patrick Bukora w’imyaka 40, Julius Saturday w’imyaka 36 na Nasolo Sauda w’imyaka 40.
Elly Maate akomeza avuga ko abateye banashimuse umuntu wa kane wari muri iyi modoka witwa Robert Mugabe kugeza ubu ukiri kumwe nabo nk’uko iyi nkuru dukesha Chimpreports ikomeza ivuga.
Umuvugizi w’igipolisi akaba yakomeje avuga ko abashimuse bari gukoresha numero ya telephone 0782992472 (wagirango ni MTN yo mu Rwanda) basaba ingurane y’amadolari 20,000 ngo barekure uwashimuswe.
