Umukuru w’igipolisi cya Uganda, IGP Gen. Kale Kayihura yashyizeho SSP Emilian Kayima nk’umuvugizi mushya w’igipolisi, amusimbuje AIGP Asan Kasingye wari wasimbuye AIGP Andrew Kaweesi nyuma yo kwicwa muri Werurwe 2017.
Abayobozi b’igipolisi cya Uganda baravuga ko AIGP Kasingye, wari usanzwe anakomatanya akazi k’ubuvugizi no kuba komiseri ushinzwe ibijyanye na politiki y’igihugu mu gipolisi, agiye kubona umwanya uhagije wo kwita ku nshingano ze.
AIGP Kasingye yagizwe umuvugizi w’igipolisi cya Uganda mu gihe igipolisi cyashinjwaga kuba bamwe mu bakigize bagira uruhare mu bikorwa by’ubugizi bwa nabi. Asimbuwe kuri uwo mwanya mu gihe igipolisi kirimo gushinjwa guhonyora uburenganzira bwa muntu.
SSP Emilian Kayima yari umuvugizi wa polisi mu mujyi wa Kampala.
Izi mpinduka zikaba zije mu gihe Igipolisi cya Uganda giherutse gushyirwa mu myanya 5 ya nyuma muri raporo ya World Internal Security and Police Index igaragaza uko Polisi z’ibihugu zihagaze hagendewe ku ngingo enye zirimo ubushobozi, imikorere, gukurikiza amategeko n’umusaruro zitanga.
Ubwanditsi
