Abanyarwanda bati uwukurusha urugo aba akurusha umugore. Iyo umuntu ashatse nabi arinda asazana agahina k’urushako rwe. Abandi bati : “inshakiramuruho ntibaza amoko”. Umugore mwiza wamubwirwa n’iki kugirango utazicuza ?
Umugore arakenewe mu kurema umuryango. Ni nyina w’abana ushinzwe kubarera no kubaremamo imico myiza n’icyungo gihuza umugabo n’abaturanyi. Ni we rwego ubutunzi bunyuriraho ngo bugere ku bintu bifitiye akamaro umuryango n’abandi.
Dore bimwe mu biranga umugore mwiza :
1. Yubaha Imana n’umugabo we ;
2. Agira umwete ku mirimo myiza ;
3. Azi kugabura ku gihe, azi no gushaka ibikenewe ;
4. Akunda gufasha abo arusha ubushobozi ;
5. Amenya kubana neza n’abaturanyi ;
6. Yita ku bashyitsi akabagirira neza ;
7. Azi kwifata mu magambo ;
8. Yihanganira ubukene n’igihombo ;
9. Ubukire ntibumutera isumbwe no kwishyira hejuru ;
10. Aharanira ibyakubahisha umugabo we.
Abagore nk’abo ni bo bubaka ingo nziza kandi zikomeye.
