Umutoza w’Umurundi Irambona Masudi Djuma yagizwe umutoza mukuru w’ikipe ya Dodoma Jiji yo mu gihugu cya Tanzania, ni nyuma yaho umutoza yaherukaga gutandukana n’ikipe ya Rayon Sports yari amazemo amezi make.
Nk’uko byatangajwe n’iyi kipe binyuze ku rubuga rwayo rwa Twitter, Dodoma Jiji yatangaje uyu mutoza nk’ugiye kubafasha muri uyu mwaka w’imikino wa 2021-2022 dore ko iyi kipe idahagaze neza ku rutonde rwa shampiyona y’ikiciro cya mbere muri Tanzaniya.
Binyuze kuri Twitter, iyi kipe ya Dodoma Jiji yagize ati “Ikipe iguhaye ikaze, Dodoma City irakwizeye kandi iragukunda”.
Kugeza ubu uyu mutoza ahawe iyi kipe ya Dodoma Jiji iri ku mwanya wa 11 n’amanota 17, mu mikino 15 bamaze gukina batsinze imikino 4 banganya 5 batsindwa indi 6.
Masudi Djuma wahawe akazi ko gutoza iyi kipe yari yahagaritswe na Rayon Sports mbere y’uko asezererwa azira umusaruro utari mwiza yagejeje kuri iyi kipe.
Mu mikino ya shampiyona y’u Rwanda yari yatoje iyi kipe, yatoje imikino 7, atsinda 3 anganya 2, atsindwa 2.
Muri rusange atoza iyi kipe izwi nka Gikundiro, yakinnye imikino 17,atsinda 7 ,anganya 5,atsindwa indi 5. Ari kumwe n’iyi kipe yinjije ibitego 16,yinjizwa 16.Yarangije imikino 7 atinjijwe igitego.
