Kayumba yanyiciye umwana , sinzongera kumufasha ukundi –Pastoro Nyirigira

Ngo uhishira umurozi akakumaraho urubyaro, hashize iminsi tubabwira ibibazo byugarije RNC umutwe w’iterabwoba wa Kayumba Nyamwasa, twababwiye uburyo Kayumba Nyamwasa yari mu mugambi wo kwikiza Ben Rutabana nyuma y’aho ingabo ze zari muri Congo zihatikiriye, ibi bikaba bitarashimishije Rutabana ndetse abishyira ku gatwe ka Kayumba wazitereranye nyuma yo kuzima ubufasha.

Byitwa ko RNC riyobowe na Gervais Condo, ariko  abakurikiranira hafi bavuga ko Gervais Condo ariho ku izina ahubwo riyoborwa na Ntwali na Kayumba Nyamwasa.

Muri RNC nyuma yaho bigaragaye ko Ben Rutabana yashimuswe ku kagamabane ka bamwe mu bayobozi ba RNC bigateza ikibazo, byatumwe benshi mu banyamuryango ba RNC bo muri Canada, Afrika y’epfo, Holland ndetse n’Ubufansa bitandukanya na RNC irangwa  n’igitugu n’ubwicanyi bwa Kayumba Nyamwasa.

Kuri ubu mu gihugu cya Uganda ahasaga nahagiye kwimurirwa ikicaro gikuru cya RNC naho batangiye gusubiranamo dore ko ubuyobozi bwari bwarashyizweho bukuriwe na Pastoro Deo Nyirigira, butagicana uwaka na Kayumba Nyamwasa.

Ubwumvikane bucye bw’aba bagabo bombi bwatewe n’uko Kayumba yitakanye Pastoro Deo Nyirigira, akamushinja ibikorwa byo gushimuta Ben Rutabana, mu mpamvu atumvaga neza. Aha Pastoro Nyirigira ngo niwe wahaye misiyo umuhungu we Felix Mwizerwa kujyana na Ben Rutabana ariko ngo bose baza gushimutirwa icyarimwe baburirwa irengero.

Amakuru ava muri Uganda aravuga ko ibi Pastoro ngo yatinye kubitangaza kuko yarazi ababiri inyuma ndetse afite icyizere ko umuhungu we ari bumubone, ariko ngo yaje gutangazwa n’uko Kayumba yamubwiye ko atamenye irengero ryabo bantu.

Ababikurikiranira hafi bavuga ko Kayumba Nyamwasa yanze kwizera Deo Nyirigira kuko yumvaga azamuvamo akavuga ko ariwe washimuse Ben Rutabana, ngo byatumye Kayumba atanga itegeko ryo kubafata bose.

Ibi byatumye RNC yo mu ntara ya Uganda icikamo ibice 2, Igice kiri inyuma ya Pastoro Deo Nyirigira ndetse n’igice kiri inyuma ya Kayumba Nyamwasa. Umwe mu bagize RNC ya Uganda uri ku ruhande rwa Deo Nyirigira yatubwiye ko biteguye gufatanya na bavandimwe ba Ben Rutabana hakagaragazwa ukuri mu ibura rya Felix Mwizerwa ndetse na Ben Rutabana.