Kuri uyu wa gatandatu tariki ya 24 Mata 2021 ku cyicaro cy’ikipe ya Rayon Sports hasinyishirijwe abakinnyi babiri mu rwego kwitegura isubukurwa rya shampiyona y’u Rwanda itegerejwe tariki ya 01 Gicurasi kugeza kuya 29 Kamena 2021.
Iyi kipe izwi nka Gikundiro ibinyujije ku rubuga rwayo rwa Twitter yatangaje ko yasinyishije umukinnyi wo hagati ufasha ba rutahizamu Muhire Kevin uzwi nka Rooney, uyu mukinnyi akaba agarutse muri iyi kipe yambara umweru n’ubururu ku nshuro ye ya kabiri.
Undi mukinnyi Rayon Sports yatangaje ni umunyekongo Héritier Nzinga Luvumbu, ni rutahizamu ukina anyuze ku ruhande wahoze akinira ikipe ya Club Athletic Youssoufia Berrechid yo mu gihugu cya Morocco.
Amakuru RUSHYASHYA NEWS yamenye ni uko aba bakinnyi bombi bagiye gufasha Murera mu gihe cy’amezi abiri gusa shampiyona y’u Rwanda izamara.
Andi makuru kandi ni uko umunyekongo
Héritier Nzinga Luvumbu we muri iki gihe ari muri Rayon Sports azatangwaho akayabo k’ibihumbi cumi na bibiri by’amadorali ni ukuvuga asaga miliyoni 12 z’amafaranga y’u Rwanda.
Luvumbu kandi yari kumwe na Repubulika Iharanira Demokarasi ya Congo muri CHAN 2016 yabereye mu Rwanda.
Muri 2013 yakiniye AS Lojolu yo muri Congo, ayivamo ajya muri AS Vita Club, Muri 2017- 2019 yakinnye muri Royale Union Saint Gilloise yo mu Bubiligi ayivamo ajya muri AS FAR yo muri Morocco.
Biteganyijwe ko Luvumbu ahita akomereza mu mwiherero wa Rayon Sports urimo kubera mu Nzove, naho Muhire Kevin we akazayigeramo mu cyumweru gitaha nyuma yo gupimwa Koronavirusi.
Rayon Sports iri mu itsinda B rya Shampiyona, izatangirira kuri Gasogi United tariki ya 2 Gicurasi, iminsi itatu mbere yo guhura na Kiyovu Sports mu gihe izasoreza kuri Rutsiro FC tariki ya 8 Gicurasi 2021.
Mu kwitegura iyi mikino, imaze gukina umukino umwe wa gicuti, aho yatsinze Bugesera FC ibitego 2-0 ku wa Gatatu mu gihe ishobora gukina na Police FC undi mukino wa gicuti ku wa Mbere tariki ya 26 Mata 2021.
