Kuri uyu wa gatanu, tariki ya 05 Kamena 2022, kuri Sitade ya Kigali i Nyamirambo habereye imikino ibiri ya gishuti aho As Kigali yatsinze Gasogi United igitego kimwe ku busa naho Rayon Sports itsinda Musanze FC.
Mu mukino wabaye ku isaha ya saa cyenda, ikipe ya As Kigali yitegura guhagararira u Rwanda mu mikino Nyafurika ya CAF Confederation Cup, iyi kipe yatsinze igitego kimwe ku busa cyatsinzwe na Akayezu Jean Bosco.
Iki gitego cyatsinzwe n’uyu mukinnyi mushya usanzwe akina yugarira ariko muri iyi minsi umutoza Casa Mbungo Andre yahisemo kumukoresha mu gice cy’ubusatirizi.
Muri uyu mukino nibwo hanagaragaye bamwe mu bakinnyi basinyishijwe n’ikipe y’abanyamujyi ya As Kigali, barimo rutahizamu Tuyisenge Jeacques wavuye mu ikipe ya APR FC.
Nyuma y’uyu mukino, nibwo ku isaha ya saa kumi n’ebyiri z’umugoroba nibwo ikipe ya Rayon Sports yakiriye Musanze FC, ni umukino warangiye ikipe izwi nka Gikundiro itsinze ibitego 2-0.
Ni ibitego byatsinzwe na Rutahizamu Leandre Onana watsinze igitego cya mbere kumunowa wa 33, gikurikirwa nicyatsinzwe na Prince Rudasingwa ku munota wa 90.
Kuri iki cyumweru, ku isaha ya saa cyenda zuzuye kuri sitade ya Kigali i Nyamirambo, ikipe ya Rayon Sports irakina umukino wa gishuti n’ikipe ya As Kigali.
