Abakobwa batatu muri 20 bageze muri Boot Camp, ku mugoroba wo kuri uyu wa kane tariki 24 Mutarama 2019 bambitswe amakamba atatu ya mbere ariyo irya ‘miss congeniality’ rihabwa umukobwa wabaniye neza bagenzi be, ikamba rya ‘miss heritage’ rihabwa uwahize abandi mu by’umuco, ndetse n’ikamba rya ‘miss photogenic’ rihabwa umukobwa waryoheje amafoto kurusha abandi.
Aya makamba yahawe Tuyishimire Cyiza Vanessa wahatanye yambaye No 6, akaba yahawe irya miss Congeniality, Ricca Michaella Kabahenda wari No.9 yambikwa ikamba rya Miss Heritage, naho Muyango Claudine wambaraga No.1 atwara ikamba rya Miss Photogenic.
Kimwe mu byatangaje abantu mu ijoro ryakeye, ni uburyo Tuyishime Cyiza Vanessa atabashije guhabwa amahirwe na bagenzi be ngo bagumane muri Boot Camp ku munsi wa kane wo gusezerera abakobwa maze arataha, ariko niwe waje gutorwa nk’umukobwa wabaniye neza abandi.
Kuri uyu mugoroba kandi habaye igikorwa cyo gusinya imihigo bazakora, igikorwa cyanitabiriwe n’umuyobozi w’itorero ry’igihugu Hon Bamporiki Edouard.
Abakobwa baserutse bambaye imyambaro ya Kinyarwanda ‘made in Rwanda’, banasangiye na bagenzi babo bageze kuri finali umwaka ushize, banahererekanya amakamba atatu yatanzwe na bagenzi babo.
Abakobwa barimo Miss Iradukunda Liliane Miss Rwanda 2018, na Miss Shanitah, igisonga cyambere cya miss Rwanda 2018 baganiriye bagenzi babo bagiye kubasimbura cyane cyane ku gushyira mu bikorwa imishinga bateguye.
Umunsi nyirizina wo gutanga ikamba no gutoranya ibisonga bya Miss, ndetse no guhemba umukobwa wakunzwe cyane ’miss popularity’ ni kuwa Gatandatu ku itariki ya 26 Mutarama 2019 I Rusororo ku nyubako ya Intare Conference Arena.
