Mu Kinyarwanda baca umugani ngo “wisunga umugabo mbwa mugakubitirwa hamwe.” Uyu mugani usa n’uwugaragaramo bamwe mu bari abayoboke ba RNC (Rwanda National Congress), bakomeje kuvumbura buhoro buhoro ko umuntu bizeye nk’umuyobozi wabo, Kayumba Nyamwasa, atari we bari bazi. Kuri ubu Serge Ndayizeye amwita Kayumba mu gihe mbere yavugaga “General”.
Mu minsi ishize, amakuru ava mu banyamuryango ba RNC agaragaza ko muri iri tsinda hakomeje kuvuka amakimbirane ashingiye ku kutizerana, gushinjanya uburiganya no kurwanira umutungo n’ibikoresho byari bisanzwe bikoreshwa mu bikorwa byaryo.
Ubu, Serge Ndayizeye wahoze ari umwe mu bayoboke bakomeye ba RNC, yafashe ubuyobozi bw’umuyoboro wa YouTube wari uzwi nka Itahuka Radio, awuhindura amazina ndetse n’amagambo y’ibanga ku buryo nta wundi muntu wo muri RNC ushobora kuwugeraho. Yayise Itahuka Media Network. Ibi byabaye nyuma y’uko havutse amakimbirane hagati ye na Jean Paul Turayishimye, aho Serge ashinjwa kuba yarambuye mugenzi we uburenganzira bwo gukoresha uwo muyoboro.
Ibi bibazo byongeye gushyira ahagaragara ibyo bamwe mu bahoze muri RNC bavuga ko ari umuco umaze igihe urangwa muri iri tsinda, harimo icyenewabo, gukoresha ikimenyane, kurwanira inyungu bwite no kutagira umurongo wa politiki uhamye.
Jean Paul Turayishimye yagiye agaragaza ko RNC yasenyutse kera, avuga ko ikibazo nyamukuru cyaturutse ku buyobozi bwa Kayumba Nyamwasa ndetse n’imicungire mibi y’umutungo w’umuryango. Kuri ubu umubano hagati ya Kayumba Nyamwasa na bamwe mu bo bakoranaga bya hafi, barimo muramu we Frank Ntwali, umeze nk’umubano w’injangwe n’imbeba. Abo muri RNC bacitsemo ibice bibiri, hakaba hari RNC ya Ntwali na RNC ya Kayumba.
Ubu uwitwa ko ari Umuhuzabikorwa wa RNC, Dr Emmanuel Hakizimana (ukorera mu kwaha kwa Kayumba Nyamwasa) yamaze kwandika ibaruwa ihagarika Serge Ndayizeye
Kimwe mu bibazo byakomeje kuvugwa cyane ni iby’amafaranga yakusanyijwe mu banyamuryango ba RNC mu bihugu byo muri Afurika y’Amajyepfo n’ahandi ku isi. Nk’uko byagiye bivugwa n’abahoze muri uwo mutwe, amafaranga arenga miliyoni imwe n’igice y’amadolari y’Amerika yari yakusanyijwe mu rwego rwo kugura intwaro no gutera u Rwanda.
Mu nama zitandukanye zabaye mu mwaka wa 2017, mbere y’amatora y’Umukuru w’Igihugu mu Rwanda, Kayumba Nyamwasa ngo yashishikarije abanyamuryango gutanga inkunga y’amafaranga, ababwira ko igihe kigeze cyo gukoresha intwaro kugira ngo bahirike ubuyobozi bw’u Rwanda. Aya magambo yatumye benshi batanga amafaranga bizeye ko azakoreshwa muri uwo mugambi.
Nyuma y’ikusanyabwishyu ryatangajwe nk’iryagenze neza, abanyamuryango batangiye kwibaza aho amafaranga yabo yagiye kuko nta ntwaro zigeze zigaragara, nta n’ibikorwa byagaragaye byari bihuye n’ibyo bari bemerewe. Nyuma y’amatora yabaye mu Rwanda mu mahoro, bamwe mu banyamuryango ba RNC batangiye gusaba ibisobanuro.
Abari hafi y’ubuyobozi bwa RNC batangiye kuvuga ko ayo mafaranga atigeze akoreshwa mu kugura intwaro nk’uko byari byatangajwe, ahubwo ngo yakoreshejwe mu bucuruzi bwite bwa Kayumba Nyamwasa, harimo kugura amakamyo yifashishijwe mu bikorwa by’ubwikorezi mu bihugu byo muri Afurika y’Amajyepfo.
Ibi byanavuzwe na Callixte Nsabimana uzwi nka Sankara, wahoze ari umwe mu bayoboke ba RNC mbere yo kwerekeza muri FLN. Mu buhamya bwe mu nkiko, yavuze ko bamwe mu banyamuryango batakarije icyizere Kayumba Nyamwasa nyuma yo kubona ko amafaranga yabo yarigishijwe.
Abasesenguzi bavuga ko amakimbirane ari muri RNC muri iki gihe ari ikimenyetso cy’uko iri tsinda rimaze igihe rihanganye n’ibibazo by’imiyoborere n’ukutizerana hagati y’abarigize. Gufatirana Itahuka Radio na Serge Ndayizeye ni kimwe gusa mu bimenyetso by’ayo makimbirane amaze igihe acicikana imbere muri RNC.
Mu gihe bamwe bakomeje kuyivamo, abandi bavuga ko RNC yahindutse urubuga rwo gushakira inyungu bwite aho kuba umuryango ufite intego zihamye za politiki.
Nk’uko umugani w’Abanyarwanda ubivuga, “agapfa kaburiwe ni impongo.” Bigaragara ko abo muri RNC bawumvise kare kuko ntawatangiranye niri shyaka ukirisigayemo.
