Impuzamashyirahamwe y’Umupira w’Amaguru muri Afurika, CAF, yaciye Ishyirahamwe ry’Umupira w’amaguru mu Burundi, FFB, amande angana n’ibihumbi 10 by’amadolari bitewe na Televiziyo y’iki gihugu yerekanye umukino wahuje u Burundi na Gabon.
Nk’uko CAF yabimenyesheje FFB mu ibaruwa yayandikiye ku Cyumweru, izishyura amadolari ibihumbi 10 inyuma yo kurenga ku mabwiriza yayo.
Iti” Turabamenyesha ko Ishyirahamwe ry’Umupira w’Amaguru mu Burundi ritubahirije amategeko ya CAF ku mukino w’umunsi wa gatandatu w’amatsinda yo gushaka itike ya CAN 2019 izabera mu Misiri. Ahabaye amakosa akurikira: RTNB yo mu Burundi yerekanye uyu mukino ibinyujije kuri Startimes na CANAL+ INTL, nta burenganzira bwa CAF ifite, bityo mukaba muciwe amande angana n’ibihumbi 10$.”
Uyu mukino wabaye ku wa Gatandatu tariki ya 23 Werurwe 2019, u Burundi bunganya na Gabon igitego 1-1 ndetse buhita bubona itike yo gukina CAN 2019 ku nshuro ya mbere mu mateka yabwo.
Umuyobozi w’ishirahamwe ry’umupira w’amaguru mu Burundi Honorable Révérien Ndikuriyo yavuze ko nka FFB, ntako batari bagize ngo birinde amakosa nk’aya. Aho asanga ababigizemo uruhare aribo bagomba kwishyura aya mafaranga baciwe na CAF.
Ati “Mugihe twari twasabye abantu bose ko bibujijwe gufata amashusho no kwerekana umukino wahuje u Burundi na Gabon, nk’uko twari twabisabwe, ko CANAL+ na SUPERSPORT aribo bari bemerewe kwerekana uwo mukino, bakaba bari basabye AZAM TV ko yaza gufata amashusho ikayashyira kuri Satellite, tumaze kubona ibaruwa ivuye muri CAF, ica FFB amande angana na 10,000$ kubera ko ngo RNTB yaba yarerekanye uwo mukino nta ruhushya ruvuye muri CAF.”
“Kubera ibyo, dusabye ababishinzwe gukora iperereza ku bijyanye n’uburyo RTNB yerekanye uwo mukino. Abazaba babifitemo uruhare bose nibo bazariha ayo mafaranga. FFB ntacyo itari yakoze kugira ngo Camera zose ntihagire n’imwe ifata amashushuo mu kibuga uretse iza AZAM TV.”
Nyuma yo kubona itike ya CAN 2019, biteganyijwe ko u Burundi buzamenya itsinda buzaba buherereyemo tariki ya 12 z’uku kwezi, nyuma ya tombola izabera i Cairo mu Misiri.
