Hashize imyaka itanu Urukiko Mpuzamahanga Mpanabyaha rw’i La Haye ( ICC) rusohoye impapuro zo guta muri yombi Mudacumura Sylvestre, umwe mu bayobozi b’umutwe wa FDLR urimo abasize bakoze Jenoside yakorewe Abatutsi.
Umuryango Uharanira uburenganzira bwa Muntu, Human Rights Watch(HRW), kuri uyu wa 13 Nyakanga 2017 wahamagariye abayobozi ba Repubulika Iharanira Demokarasi ya Congo (RDC) n’abari mu butumwa bwa Loni mu kugarura amahoro muri iki gihugu kongera imbara mu gushakisha Mudacumura akoherezwa i La Haye.
Nk’umuyobozi w’ingabo za FDLR ashinjwa ibyaha bitandukanye birimo gutera abaturage, ubwicanyi, gufata ku ngufu abagore, iyicarubozo, gusahura n’ibindi.
Ibyo byaha ashinjwa byakozwe hagati ya Mutarama 2009 na Nzeri 2010 mu Ntara y’Amajyaruguru ya Kivu. Raporo ya Human Rights Watch ivuga ko muri icyo gihe hishwe abasivile barenga 700 bishwe na FDLR. Abenshi mu bishwe ni abagore n’abana n’abasaza bicishijwe imihoro cyangwa bagatwikiwe mu nzu zabo.
HRW inibutsa ko bamwe mu bayobozi ba FDLR basize bakoze Jenoside yakorewe Abatutsi mu Rwanda mu 1994, bahungira muri RDC.
Mu gihe bataragezwa imbere y’ubutabera, HRW irashinja uyu mutwe wa FDLR gukomeza gukora ibyaha, rimwe na rimwe ufatanyije n’indi mitwe iri muri Congo cyangwa se bamwe mu basirikare b’ingabo za leta ya Congo Kinshasa.
Gen.Mudacumura Sylvestre uri inyuma ya Habyarimana
HRW ivuga ko itabwa muri yombi rya Mudacumura ari ryo ryaha agahenge abasivile bahohoterwa. Byiongeye kandi uyu muryango uharanira uburenganzira bwa muntu ukuvuga ko yafatwa habayeho ubushake bwa politiki.
Source : Igihe.com
