Ibintu bitandatu [ 6 ] bigaragaza isenyuka rya RNC na P5.

RNC Yashinzwe na Kayumba Nyamwasa na bagenzi be aribo Col.Patrick Karegeya wakoraga mu rwego rw’ubutasi, Théogène Rudasingwa wakoraga muri Perezidansi na Gérald Gahima wabaye Prokireli wa Repubulika, aba bose icyo bahuriyeho ni ubugambanyi, kwikubira ndetse no Kwishyira hejuru, ari nabyo byabatandukanije n’umuryango RPF-Inkotanyi wabagize icyo baricyo ndetse na Perezida Kagame wabizeye akabaha imyanya ikomeye, ariko bakaza kuba ibigwali cyangwa se ibigarasha.

Kayumba Nyamwasa yahunze ubutabera bw’u Rwanda mu 2010 kubera ibyaha yarakurikiranyweho  ubwo yari ambasaderi w’u Rwanda mu Buhinde, ibi byaha birimo kubazwa inshingano, agasuzuguro ndetse n’ ubugambanyi burimo guhungisha bamwe mu bahoze mu gisilikare no muri Politiki abacishije Uganda kubufatanye na Perezida Museveni, Salim Saleh n’inzego z’ubutasi bwa gisilikare muri Uganda.

Ibi bikorwa bya Kayumba byateguraga ishingwa ry’ umutwe w’iterabwoba wa RNC ufite intego zo guteza umutekano mucye mu gihugu,  nkuko uyu mutwe mu mwaka wa 2010-2014 wagiye ugaba ibitero utera gerenada ahantu hatandukanye mu mugi wa Kigali hateraniye abantu benshi, abagera kuri 17 bahasiga ubuzima naho abasanga 400 barakomereka abandi bakuramo ubumuga buhoraho.

Muri Mutarama 2011, Urukiko rwa Gisirikare rwakatiye Kayumba na Rudasingwa igifungo cy’imyaka 24 no kwamburwa impeta za gisirikare, Gahima na Patrick Karegeya bo bahanishwa igifungo cy’imyaka 20 bamaze guhamwa ibyaha birimo gushinga umutwe w’iterabwoba, kugerageza guhungabanya umutekano w’igihugu, kutubahiriza amategeko hamwe nibindi. Kugeza uyu munsi aba bagabo bagiye batandukana biturutse kubwumvikane bucye hagati yabo, ndetse Patrick Karegeya we baza kumugambanira aricwa, naho Rudasigngwa na Kayumba bananiwe kumvikana bituma RNC icikamo ibice bibiri. RNC ya Rudasingwa ubu ikaba yarahawe izina ry’ISHAKWE naho iya Kayumba Ikomezanya RNC.

Impamvu 6 zigaragaza ko RNC iri mu marembera:

1. RNC yacitsemo ibice

Kayumba Nyamwasa tariki 26 Nyakanga 2016, yashyize hanze ibibazo byavugwaga muri RNC, ubuhemu bwa Rudasingwa washakaga gusenya iryo shyaka biciye mu gukurura amacakubiri ashingiye ku moko no gushaka kuryigarurira biciye mu kwanga amatora n’ibyayavuyemo.

Ubu bwumvikane buke bwatumye Rudasingwa amwiyomoraho kuko nawe yashinjaga Kayumba gushinga agatsiko kabahoze ari abasirikare ari nabo yashakaga ko bayobora gusa ibi ndetse akamushinja n’ivangura aho yavugaga ko Kayumba adashaka Abahutu muri RNC, ibi byatumye ashinga umutwe we yise New RNC (Ishakwe), ajyana n’abari bamushyigikiye b’abasivili,  biganjemo Abahutu yavugiraga naho abasirikare basigara mu rundi ruhande muri RNC ya Kayumba.

Rudasingwa yahise ashyiraho Komite y’agateganyo yo kuyobora New RNC (Ishakwe) mu gihe cy’iminsi 30 aho we yari Chairman, umwungirije ari Joseph Ngarambe naho Umunyamabanga ari Jonathan Musonera.

Bahise biyemeza kandi kwitandukanya n’umuntu uwo ariwe wese ushyigikiye Kayumba ndetse wemera amatwara ye.

Ubwo Kayumba nawe yasigaranye ikindi gice cya RNC kurubu iyobowe na Jerome Nayigiziki, wungirijwe na Kayumba Nyamwasa.

Kurubu iyi RNC ya Kayumba abo barikumwe nabo bananiwe kumvikana bamaze gucikamo ibice bibiri nyuma yaho ingabo za RNC zirasiwe umugenda zigashwiragira mu bihuru muri Repubulika iharanira demokarasi ya Congo, abenshi bakahasiga ubuzima abandi bagafatwa mpiri, ibi byarakaje Jean Paul Turayishimye, Major Micombero na Ben Rutabana. Aba bagabo bashinja Kayumba Nyamwasa Kwicisha abarwanyi ba RNC muri Congo, gukuza politike ya Munyangire, kurema udutsiko, inda nini n’amacakubiri ashingiye ku moko ndetse no kwigwizaho ibyagenewe gutunga abarwanyi ba RNC muri Congo ku buryo byatumye aba barwanyi bahatikirira nyuma yo kwicwa n’inzara  bagacikamo ibice bibiri icyajyanye na Major Habib Mudasiru n’icyagumanye n’Abanyamulenge kirimo uwitwa Karemera na Nyamusaraba.

Iyi RNC ya Kayumba nayo ubu ikaba ntaho isigaye kuko na Rujugiro wafashaga uyu mutwe witwaje Intwaro nawe kurubu atakiri kuvuga rumwe na Kayumba, Nyuma yaho amafaranga ahwanye na Miliyoni y’amadolari 1.000.000$, Kayumba yabonye mu bice bibiri yayasangiye na Brig . Abel Kandiho ushinzwe CMI ya Uganda, igice kinini agishora mu bucuruzi bwe bwite muri Mozambike, abana yohereje muri Congo kubufatanye na Museveni bicirwayo inzara batagira n’icyo kwambara kugeza ubwo batikiriye muri ayo mashyamba.

2. RNC Yatakaje abarwanyi bayo n’abari abayobozi babo babura inzira

Icyatumaga Kayumba afashwa na Uganda na Rujugiro nuko yababwiraga ko afite abarwanyi bakomeye muri Congo, aho Uganda ibinyujije mu kigo gishinzwe ubutasi bw’igisirikare cya Uganda CMI yafashaga RNC gushaka abarwanyi bakoherezwa muri Congo banyuze Tanzania none Tanzania yafunze inzira yakoreshwaga  na RNC ndetse ibaha gasopo yo kutongera kunyura mu gihugu cyabo, n’ubwo kuri ubu hasigaye mbarwa mubari abarwanyi ba RNC bose barishwe abandi bari abayobozi b’uyu mutwe bafashwe mpiri.

Cpt SIBOMANA Charles aka Sibo yiciwe mu gitero Cya FARDC, naho HABIBU Mudasiru we atabwa muri Yombi, ubu ari mu maboko y’ubuyobozi bw’u Rwanda, aho atanga ubuhamya kubyababaye ho muri Congo n’uko batereranywe na Kayumba wabashutse akabashora muri ayo mashyamba ntabahe ubufasha, ahubwo akanyereza ibyari bibagenewe none impfubyi n’abapfakazi bararira ayo kwarika kuko babuze imiryango yabo. Ibi kandi byakurikiwe no gusenya ibirindiro bya FDLR nayo abarwanyi bayo barashwe bose abandi bafatwa n’igisirikare cya FARDC, ababa barabashije gutoroka nabo ntabirindiro bafite kuko bose bari baramaze kwihuriza hamwe mu mutwe wa P5 waruyobowe na Kayumba Nyamwasa, uyu mutwe wari waragabanye ibirindiro, bibiri mubyari bikomeye byari biyobowe nabahoze ari abasirikare bakomeye byose byashyizwe hasi. FARDC Ikomje kuzenguraka amashyamba ya Congo yose ngo barandure izi Nyeshyamba zibumbiye muri P5 nindi mitwe.

3. Amabanga yose ya RNC yashyizwe hanze

Nyuma yiraswa ry’umuyobozi w’abarwanyi ba FDLR General Mudacumura, umurambo we bawusanganye Flash Disk yari yihambiriye mu ijosi, ndetse na Computer laptop yari mu birindiro bye, byari bibetsemo amabanga yose ya FDLR ndetse na P5 yarikuriwe na Kayumba Nyamwasa, aya mabanga akurikirana nayo Major HABIBU Mudasiru, abakuru ba FDLR; Nsekanabo Jean Pierre uzwi nka Abega Kamara na Nkaka Ignace uzwi nka La Forge Fils Bazeye Bashyize hanze. Ibi rero byatumye kugeza uyu munsi ntabanga narimwe RNC ibitse, ubu imikorere yayo yose, abayitera inkunga bizwi na Leta y’U Rwanda ndetse n’igisirikare cya Congo.

4. RNC yananiwe kwishyura imyenda ibireyemo ibigo 3 byo muri Canada

Kuri ubu RNC ntamutungo isigaranye kuko iyo yarifite Kayumba Nyamwasa yiyishoye mu bucuruzi bwe akorera muri Mozambike bwo gucuruza ibiribwa ingano, ibishyimbo n’ubunyobwa.. ndetse aguramo n’amakamyo ya Rukururana, ibi akaba ari nabyo byatumye atandukana na Major Micombero, Jean Paul Turayishimye, Ben Rutabana n’abandi..ibi kandi byaje bikurikirana n’umwenda RNC ibereyemo ibigo bitatu byo mu gihugu cya Canda B2B bank, Fairstone, Olympia Trust Company uhwanye na 450,000$, kuri ubu RNC ikaba iri mu mazi abira, kwishyura aya mafaranga byababereye ihurizo rikomeye, kuko bitana ba mwana mu muburyo bwimikoreshereze mibi yaya mafaranga ndetse n’ibikoresho( Imodoka, amazu yo kubamo no gukoreramo) bakaba banitana ba mwana kubijyanye n’imikoreshereze yaya mafaranga.

5. RNC ntabushobozi igifite nabuto mu mikorere yabo

Kuri ubu RNC ntabushobozi isigaranye nyuma yaho amafaranga yose Kayumba Nyamwasa yayashoye mu bucuruzi bwe bwite mu gihugu cya Mozambique, RNC kandi ifite imyenda myinshi kwishyura bitayoroheye. Rujugiro na Museveni bafashaga uyu mutwe wa gisirikare nabo bakozwe ni soni aho bamariye kubona ko amafaranga bari bashoye muri uyu mutwe wa P5 maze Kayumba Nyamwasa akayakubita umufuka ndetse n’ukuriye ikigo cy’ubutasi bw’igisirikare cya Uganda CMI Brig Abel Kandiho. Ubu Rujugiro nawe yataye umutwe ntabwo bizapfa koroha kongera gushora amafaranga ye mubarwanyi badahari kuko ntakizere yapfa kongera kugirira Kayumba.

6. Kayumba Nyamwasa afite ubwoba

Kayumba Nyamwasa afite ubwoba bwinshi, aziko kubera ubusambo bwe isaha nisaha Jean Paul Turayishimye, Major Micombero, Ben Rutabana n’umupfakazi Lea Karegeya bamuhirika, bakamukorera Coup d’Etat, bityo nawe ari mu migambi yo gushaka uko yakwirenza bamwe muri abo, birazwi ko Kayumba ari umwicanyi ruharwa, abantu ba Mozambique bazi uko yicishije Baziga wari umucuruzi akaba umuyobozi wa Diaspora Nyarwanda  yicishije amuhoye ko yamenye uby’ubucuruzi bwe muri Mozambique.

Kayumba afite ubwoba kuba yakongera gutangiza umutwe witerabwoba  kuko ntawakongera kumuyoboka cyane ko uwo yarakuriya waRNC/ P5 waboneye muri Congo icyo imbwa yaboneye ku iriba, ibi byahaye isomo  abantu benshi Kayumba yashutse ndetse  kuri ubu Kayumba, aradagadwa ahinda sekadegeri aziko nawe isaha nisaha byamubaho cyane ko RNC yashyizwe kurutonde rw’imitwe y’iterabwoba ku isi, ubu Kayumba nawe akaba ari gushakishwa n’inzego z’ubutasi ku isi hose kuburyo ibyo akora byose afite ubwoba bwinshi cyane, ndetse akaba  atekereza uko yatakaje inkoramutima ze bigeze gukorana igisirikare igihe bari bakiri mu ngabo za RPA, nka Cpt Sibo warashwe ndetse na Major Habibu ubu uri muRwanda n’abandi batorongeye.

Nguko guhemuka, ugahemukira umuryango wakureze, ukaba ikivume muri rubanda bikubyarira umuvumo wo gupfa wangara.