Umusirikare umwe wa Uganda yarashwe arapfa undi arakomereka bidakomeye ubwo ingabo za Uganda zifatanyije n’abashinzwe kurinda pariki barasanaga n’inyeshyamba za M23 zageragezaga kwambuka ziva muri Congo zishaka kwinjira muri Kisoro zinyuze muri pariki y’Ibirunga.
Umukuru wa komite y’umutekano y’Akarere ka Kisoro, Shafique Ssekandi, yavuze ko umusirikare wishwe ari Lence Corporal David Ojuna naho uwakomeretse akaba ari John Busoborwa. Ibi bikaba byarabaye mu ntangiriro z’iki cyumweru turi gusoza nk’uko tubikesha ikinyamakuru Redpepper.
Nk’uko Ssekandi yakomeje atangaza, ngo ibi byabaye mu masaha ya saa cyenda kuwa kabiri ushize. Inyeshyamba 3 za M23 zatawe muri yombi naho indi nyeshyamba imwe iricwa muri iyo mirwano nk’uko inkuru ikomeza ivuga.
Kuri uyu wa kane ushize, Ssekandi akaba yarongeye gutangaza ko umuryango w’umusirikare wishwe uzoherezwa iwabo ngo ushyingurwe, mu gihe umurambo w’umurwanyi wa M23 washyinguwe muri Kisoro.
Yongeyeho ko abarwanyi ba M23 bafashwe bashyikirijwe icyicaro gikuru cya division ya 2 y’ingabo za UPDF muri Mbarara.
